SQO turǵyny sýǵa bata jazdaǵan eki balany qutqaryp qaldy
PETROPAVL. QazAqparat – Soltústik Qazaqstan oblysy Mamlıýt aýdany Voskresenovka aýylynyń turǵyny Vladımır Vorobev sýǵa batyp bara jatqan eki balany qutqaryp qaldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, mal jaılap júrgen aýyl turǵyny Vladımır Vorobev kól jaqtan kómekke shaqyryp shyńǵyrǵan bala daýsyn estıdi. Bárin tastaı sala júgirgen er adam kóldiń betinde, jaǵadan 15 metrdeı jerde, muz ústinde turǵan kórshiniń qyzyn baıqaıdy. Al odan birer metr jerde oıylǵan muzdy sýda eki balanyń jantalasyp jatqanyn kóredi.
Oılanbastan muz ústine shyqqan ol balalarǵa qaraı júgire jóneledi.
«Sýdyń beti áli durys qatyp úlgermegen, muz salmaǵymdy kótermeı birden oıylyp ketti. Jaryp otyryp, balalarǵa jettim. Olardy sý betinde kýrtkalary ustap turdy. Men Jenıa men Lenıany qatty ustap aldym», - dep eske aldy aýyl turǵyny.
Tereńdigi shamamen 3 metrge jetetin kólden eki balamen shyǵý ońaı bolmapty.
«Olardy kezekpen tabanym jerge tıgenshe joldaǵy muzǵa laqtyrýǵa týra keldi. Jaryp otyryp, jaǵaǵa alyp shyqqanda bizdi áıelim Tatıana kútip turdy. Ol meniń aıqaıymdy estip, úıde júrgen qalpy jalańaıaq atyp shyǵypty. Balalardy úıge aparyp, sheshindirip, ysqylap jylytyp, áke-sheshelerine qońyraý shaldy», - deıdi Vladımır Alekseevıch.
Tatıana Vladımırovnanyń aıtýynsha, balalar qatty shoshyǵan, jarty saǵat boıy anyq sóıleı almapty. Balalardy tynyshtandyrǵansha olardyń ata-analary da kelip jetedi. Bolǵan oqıǵadan úreıi ushqan olar eki balasyn aman alyp qalǵan Vorobevtarǵa alǵystaryn jaýdyrdy.
35 jastaǵy Vorobevtardyń ózderiniń 11 aılyq, 1,5 jáne 3 jasar úsh balasy bar eken. Zardap shekken balalardy: 8 jastaǵy Evgenııdi de, 10 jastaǵy Leonıdti de kishkentaıynan jaqsy biledi. Áke-sheshelerimen aralasyp turady.
Qutqarýshylar Vladımır Vorobevtiń bul isin erlikke balaıdy. Olardyń aıtýynsha, aýyl turǵyny kómekke kelmegende osydan 18 jyl buryn bolǵan qaıǵyly oqıǵa qaıtalanýy múmkin edi. 2001 jyly 3 qarasha kúni Jambyl aýdanyndaǵy Sýatkól kólinde muz jarylyp ketip, oınap júrgen 8 ben 13 jastaǵy 5 bala qaza tapqan edi.
