SQO turǵyny órtengen úıden eki balany jáne gaz ballonyn alyp shyqty
PETROPAVL. QazAqparat – Soltústik Qazaqstan oblysynda aýyl turǵyny órtengen úıden 11 jáne 6 jastaǵy eki balany aman alyp shyqty, dep habarlaıdy QazAqparat tilshisi.
SQO Aqqaıyń aýdanynda ótken aptada birden úsh órt tirkeldi. 4 qazan kúni aýdan ortalyǵy Smırnov eldi mekeninde saǵat 10.00 shamasynda turǵyn úı órtendi.
«Aýyl turǵyny qyraǵylyq tanytyp, nátıjesinde eki bala aman qaldy. Er adam kóligimen ótip bara jatyp, úıdiń shatyrynan tútin shyǵyp jatqanyn baıqap qalǵan. Birden kómekke umtylyp, úıden 2010 jáne 2015 jyly týǵan eki balany alyp shyqty. Olardy kórshilerge aparyp, janyp jatqan úıge qaıta kirgen. Ondaǵy gaz ballonyn shyǵaryp úlgerdi. Qazir ol azamatty marapattaý máselesin qarastyryp jatyrmyz», - deıdi Aqqaıyń aýdandyq tótenshe jaǵdaılar bóliminiń basshysy Erjan Sháripov.
Mamannyń aıtýynsha, balalar úıde jalǵyz bolǵan. Olardyń analary aýrýhanada jumys isteıdi. Ákeleri ony úıge alyp kelýge ketken. Baspana tolyqtaı janyp ketti.
Jyl basynan óńirde 547 órt tirkeldi, bul ótken jyldyń osy merzimimen salystyrǵanda 10% artyq. 40 adam mert boldy, bul – 8% kóp, byltyr osy aralyqta 37 adam qaza tapty. Kelgen materıaldyq shyǵyn 215 mln teńgege jetti, osylaısha eki esege artyp otyr. Bolǵan órtterdiń 388-i - 71% jeke turǵyn úı sektoryna tıesili.
