SQO turǵyny memlekettik baǵdarlama arqyly qoı sanyn 300-ge jetkizbek
SQO kásipkerler palatasy baspasóz qyzmetiniń málimetinshe, óńir turǵyny Talǵat Toqtamysov bıyl kóktemde «Bastaý Bıznes» kýrsynan ótip, 200 AEK kóleminde óteýsiz grantqa qol jetkizdi.
Er adam mal sharýashylyǵymen aınalyspaq bolyp, bul aqshaǵa 12 qoı jáne óz aqshasyna gıssar tuqymdy taǵy úsh qoshqar satyp aldy.
Endi birer jylda shaǵyn sharýashylyǵyn qoı fermasyna aınaldyryp, túlik sanyn 300-ge deıin jetkizbek.
«Qala syrtynan mal ósirýge qolaıly jer aldym. Biraq qoı basyn kóbeıtýge óz qarajatym jetpedi. Sondaı-aq jem-shóp pen qurylys materıaldaryn da satyp alý qajet boldy. SQO Kásipkerler palatasy janynan «Bastaý Bıznes» túlekteriniń jobalaryn nesıelendirý úshin arnaıy «Atameken Qyzyljar» mıkroqarjy uıymy qurylǵanyn bilgen soń, men oǵan jyldyq 6 %-ben jeńildetilgen nesıe alý úshin júgindim. Úıimdi kepilge qoıyp, 5 jyl merzimge 5 mln teńge somasynde nesıe aldym. Qaryzdy tek bir jyldan keıin ǵana qaıtara bastaımyn. ıAǵnı, meniń nesıe boıynsha alǵashqy tólemim 12 aıdan keıin bolady. Bul óte yńǵaıly, óıtkeni osy ýaqyt ishinde satyp alǵan qoıym qozdap, kóbeıedi, olardy satyp qaryzymnan qutyla alamyn», – deıdi kásipker Talǵat Toqtamysov.
Bıyl Talǵat sııaqty 9 soltústikqazaqstandyq 6 %-ben jalpy somasy 26,5 mln teńge nesıe aldy.
Qazirgi ýaqytta taǵy 392 mln teńgege 91 ótinim mıkroqarjy uıymynyń kredıttik menedjerleriniń qaraýynda jatyr.
«Jeńildetilgen nesıeni «Bastaý Bıznes» túlekteri qaı jyly oqyǵanyna qaramastan ala alady. Eger bul aýyldyq eldi mekender men shaǵyn qalalardyń turǵyndary bolsa, onda olar 2,5 myń AEK-ke deıin, al petropavldyqtar 6,5 myń AEK-ke deıin shaǵyn nesıe ala alady. Qaryz 5 jylǵa deıingi merzimge, al mal sharýashylyǵy salasyndaǵy jobalar úshin 7 jylǵa deıingi merzimge beriledi. Qaryz alýshyǵa basty talap - problemalyq bereshektiń bolmaýy», – deıdi mıkroqarjy uıymy dırektorynyń mindetin atqarýshy Tımýr Ysqaqov.
SQO Kásipkerler palatasynyń dırektory Álibek Ashmetovtyń aıtýynsha, SQO-ǵa «Bastaý Bıznes» túlekteriniń jobalaryn nesıelendirýge respýblıkalyq bıýdjetten 1 mlrd teńge bólindi.
«Osy jáne kelesi jyly kýrstan ótkenderdiń jobalaryn jalpy somasy 1 mlrd teńgege qarjylandyrýdy josparlap otyrmyz. Bıyl biz 922 óńir turǵynyn oqyttyq. Onyń ishinde 321 túlektiń jobasy 1 mlrd teńgeden astam somaǵa qarjylyq qoldaý qory arqyly qarjylandyryldy, 400 adam 240 mln teńge somaǵa grant aldy. Taǵy 9 túlek mıkroqarjy uıymy arqyly 26,5 mln teńgege nesıe aldy», – deıdi Álibek Ashmetov.
