SQO turǵyny mal baǵyp júrip snarıad taýyp aldy
PETROPAVL. QazAqparat - Soltústik Qazaqstan oblysy Qyzyljar aýdanynyń Bolshaıa Malyshka eldi mekeni mańynda mal baǵyp júrgen malshy snarıadqa uqsas temir zat taýyp aldy, dep habarlaıdy QazAqparat tilshisi.
SQO PD baspasóz qyzmetiniń málimetinshe, aýdan turǵyny birden polıtsııa bólimine habarlasqan. Oqıǵa ornyna jetken tártip saqshylary tabylǵan zattyń 30 mm artıllerııa oǵy ekenin anyqtady. Arnaıy konteınerge salynǵan jarylǵysh zat ekinshi kúni Petropavldaǵy QR Ulttyq Ulan Áskerı ınstıtýtynyń oqý polıgonynda jaryldy.
«Bul bıyl tabylyp otyrǵan alǵashqy jarylǵysh zat. Jerde kóp jatqandyqtan tot basqan, belgileri de kórinbeıdi. Sol sebepti naqty qaı jyldary shyqqanyn anyqtaý múmkin bolmady. Bizdiń boljaýymyzsha azamat soǵysynan qalǵan jurnaq», - deıdi SQO PD oqý-jattyǵý vzvodynyń komandıri Oleg Gýrskıı.
Tártip saqshylarynyń aıtýynsha, jarylǵysh zattar buǵan deıin de birneshe márte Jambyl, Mamlıýt jáne Qyzyljar aýdandarynyń aýmaǵynda tabylyp, joıyldy. Olardyń barlyǵy ótken ǵasyrdyń birinshi jartysynda jasalǵan eski qarý-jaraq.
