SQO turǵyny qus ósirip, tabysqa keneldi
Óńir turǵyny Záýresh Qoshanova byltyr ómirin kúrt ózgertýge bel býady. Osylaısha kóptegen armandaǵan óz isin ashý úshin memlekettiń qoldaýyna júginbek bolady.
«25 jyl memlekettik qyzmette jumys istedim. Bul az emes, ádette osynsha ýaqyttan keıin basqa salaǵa aýysý ońaı emes. Desek te, sol kezde qabyldaǵan sheshimime ókinbeımin. Adam ózgeristen qoryqpaýy kerek. Ári oılaǵandy júzege asyrýǵa «Bastaý Bıznes» memlekettik baǵdarlamasy kómektesedi. Men oqýǵa ótinish berdim, kýrsty jáne qorytyndy testileýdi ońaı tapsyrdym. Suranys pen ótkizý naryǵyn taldaǵannan keıin qus sharýashylyǵy baǵytyn tańdadym. Bıznes-jospar ázirlep, ony sátti qorǵap, 584 myń teńge kóleminde grant aldym», - deıdi kásipker.
Bul qarajatqa Záýresh Qoshanova qus qora salyp, 250 mekıen jáne 220 broıler taýyǵyn satyp alady.
«Árıne, qus ósirý - bul óte tıimdi bıznes, onyń birqatar artyqshylyqtary bar. Iıa, bastapqyda nátıjesi qalaı bolar eken dep qoryqtym. Qıyndyqty jeńýge otbasym kómektesti. Jumyrtqa men qus etine qasha da suranys joǵary. Sondyqtan ónim esh qıyndyqsyz satylyp jatyr. Negizgi bóligin halyq tikeleı úıden satyp áketedi. Artylǵanyn jergilikti dúkenge ótkizemin», - deıdi Záýresh Qoshanova.
Broılerlerdiń birinshi partııasyn bordaqylap, satqannan keıin, kásipker túsken qarajatqa 120 qaz satyp alǵan. Bolashaqta Zaýresh tek qaz ósirýmen aınalysýdy josparlap otyr. Іsin jańa bastaǵan áıel qus fermasyn ashyp, isin keńeıtpek, qosymsha jumysshylar almaq.
SQO Kásipkerler palatasynyń dırektory Álibek Áshmetovtyń aıtýynsha, bıyl «Bastaý Bıznes» jobasy boıynsha 922 soltústikqazaqstandyq oqýdan ótken.
«Bıyl túlekterdiń 613-i grant aldy, al óz isin ashýǵa 170 adam jeńildetilgen nesıe aldy, onyń ishinde bir nesıe óńirlik kásipkerler palatasy janynan qurylǵan «Atameken-Qyzyljar» mıkroqarjy uıymy arqyly berildi», – deıdi Álibek Áshmetov.