SQO turǵyny koronavırýs ınfektsııasyn eki áriptesine juqtyrǵan
«Qazir oblysta koronavırýs juqtyrǵan 7 adam tirkeldi. Petropavl qalasynda 3 jańa oqıǵa anyqtaldy. Eki áıel oblys ortalyǵynda aýrý juqtyrǵan áıelmen birge jumys istegen. Olar qalalyq jumyspen qamtý ortalyǵynda eńbek etken. Sonymen birge, Petropavl qalasynyń karantındik statsıonarynyń medıtsınalyq qyzmetkeri vırýs juqtyrdy», - dedi oblys ákimi «QYZYLJAR» telearnasynyń tikeleı efırinde.
Taǵy bir vırýs juqtyrý oqıǵasy Taıynsha qalasynda tirkeldi. Aýdandyq aýrýhananyń laboranty Kellerovkadan kelgen naýqas áıelmen baılanysqan. Qazir Taıynsha qalasy jáne ondaǵy aýdandyq aýrýhana 14 kúnge karantınge jabyldy.
Ákimniń aıtýynsha, naýqastardyń barlyǵy Petropavl qalasynyń juqpaly statsıonaryna jatqyzyldy. Jaǵdaılary birqalypty. Baılanysta bolǵandar anyqtalyp, karantındik statsıonarǵa jiberilgen.
Ekinshi juqtyrý jaǵdaıy Kellerovka aýylynyń 40 jastaǵy turǵynynan tabyldy. Ol aýyldyq ambýlatorııada sanıarlyq qyzmetker bolyp jumys istegen. Naýqas Petropavl qalasynyń juqpaly statsıonaryna jetkizildi. Aýyl 14 kúnge karantınge jabyldy. Naýqaspen baılanysqan turǵyndar Kellerovkanyń karantındik gospıtaline jáne úı karantınine jatqyzyldy. Alynǵan barlyq synmalar teris nátıje kórsetti.
Kellerovkaǵa kirýge jáne shyǵýǵa tyıym salyndy. Onda tek azyq-túlik pen dári-dármek jetkiziledi. Qoǵamdyq oryndar dezınfektsııalandy. Barlyq oqıǵalar boıynsha vırýs tabylǵan jumys jáne úı oshaqtary oqshaýlanyp, sanıtarlyq jáne dezınfektsııalyq óńdeý júrgizildi.
«Qazir Petropavlda 5 juqtyrý oshaǵy bar. Kópqabatty úılerdiń turǵyndaryna shydammen jáne sabyrmen qaraýdy suraımyn. Qazir sýpermarketter azyq-túlik jetkizýmen aınalysyp jatyr. Naýqastardyń biri birinshi qalalyq emhanaǵa barǵan. Sondyqtan, turǵyndardan medıtsınalyq mekemelerge barmaýdy ótinemin. Dárigerlerdiń ózi sizderge barady», - dedi Q. Aqsaqalov.
KVI belgileri baıqalǵan jaǵdaıda, 1406 nemese 103 nómirlerine habarlasý qajet.
