SQO turǵyny qoldan jasalǵan 2,5 myń lıtr araqpen ustaldy

PETROPAVL. QazAqparat – Soltústik Qazaqstan oblysynyń turǵynyn polıtseıler 2,5 myń lıtr kontrafaktilik ónimmen ustady. Jalpy bıyl tártip saqshylary zańsyz aınalymnan 5 myń lıtr shamasynda spırttik ishimdikterdi aldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, tártip saqshylaryna 33 jastaǵy er adamnyń quramynda spırti bar ónimniń zańsyz aınalymyna qatysy bary týraly aqparat túsken.

Petropavl qalalyq polıtsııa basqarmasy jergilikti polıtsııa qyzmetiniń qyzmetkerlerimen birlesip, Petropavl aýmaǵynda «GAZel» avtokóligin basqarǵan aýyl turǵynyn toqtatady.

Júk kóliginen kontrafaktilik araq quıylǵan 500 dana bes lıtrlik plastıkalyq ydys tabyldy.

Petropavl qalalyq polıtsııa basqarmasynyń jergilikti polıtsııa qyzmeti bóliminiń qyzmetkerleri ákimshilik quqyq buzýshylyq boıynsha materıal jınady.

«Kontrafaktilik alkogoldi tutyný qaýipti. Sonymen qatar, alkogoldik ishimdikterdiń zańsyz aınalymy mas kúıde qylmys jasaý qaýpin arttyrady. Qańtar aıynan bastap oblysta uıymdasqan qylmysqa qarsy kúres basqarmasy qyzmetkerleri jergilikti polıtsııa qyzmetimen birge osyndaı birneshe faktini tekserdi, nátıjesinde zańsyz aınalymnan 2144 lıtr alkogol tárkilendi», - deıdi SQO PD uıymdasqan qylmysqa qarsy kúres basqarmasy bastyǵynyń mindetin atqarýshy Rahat Nurahmetov.

Al jalpy jyl basynan beri SQO-da 4820 lıtr spırti bar ónim tárkilendi.