SQO turǵyny «GAZeldi» aıdap áketip, elektr stansasynyń qorshaýyna soǵyldy
PETROPAVL. QazAqparat – Soltústik Qazaqstan oblysynda mas er adam «GAZel» kóligin aıdap áketip, qorshaýdy soqty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Jambyl aýdandyq polıtsııa bólimine «GAZel» kóliginiń aýdandyq elektr stansasynyń qorshaýyna soǵylǵany jóninde habarlama túsedi.
Kólikti aýdannyń 41 jastaǵy turǵyny basqarǵan. Medıtsınalyq kýálandyrý onyń mastyǵyn kórsetti. Sondaı-aq er adamnyń buǵan deıin kólik júrgizý quqyǵynan aıyrylǵandyǵy belgili boldy. Avtomobıl onyń jumys berýshisiniki eken.
Bul derek Sotqa deıingi tergep-tekserýdiń biryńǵaı tizilimine eki bap (kólikti basqarý quqyǵy bolmasa da, mas kúıde júrgizý jáne bireýdiń avtokóligin zańsyz ıemdený) boıynsha engizildi.
Kúdikti qamaýǵa alynyp, kólik arnaıy avtoturaqqa qoıyldy. Ol tergeý amaldary aıaqtalǵannan keıin ǵana ıesine qaıtarylady.
«Bul oqıǵa mas kúıde kólik júrgizýdiń qaýipti ekendiginiń taǵy bir dáleli. Kólik júrgizý quqyǵynan aıyrylsa da, mas kúıde rýlge otyrýdyń bıyldyqqa osymen ekinshi jaǵdaıy tirkelip otyr. Zań boıynsha qylmystyq jaýapkershilik bar. Aıyppul tóleýden bas bostandyǵynan aıyrý jazasyna deıin qarastyrylǵan. Sondaı-aq ómir boıyna kólik júrgizý quqyǵynan aıyrylady», - deıdi Jambyl aýdandyq polıtsııa bóliminiń basshysy Asan Meıramov.
Tek Jambyl aýdanynda ǵana jyl basynan 27 mas júrgizýshi anyqtalyp, jazaǵa tartyldy.
