SQO turǵyny baqshasyna qarbyz egip, 2 tonnaǵa jýyq ónim aldy
PETROPAVL. QazAqparat – Soltústik Qazaqstan oblysy Korneevka eldi mekeniniń turǵyny teriskeıde óse qoımaıtyn qarbyzdy egip, 2 tonna shamasynda ónim aldy, dep habarlaıdy QazAqparat tilshisi.
SQO Esil aýdany Korneevka eldi mekenindegi Malvenovter otbasy 10 sotyq jerge qarbyz egip, óńir úshin rekordtyq ónim aldy. Árqaısysy shamamen 7 keliden. Arasynda 12-14 keli tartatyndary da bar.
Otaǵasy Nıkolaı Malvenov qarbyz ósirýdi 3 jyl buryn qolǵa alǵan eken.
«Internetti qarap otyryp, Nıkolaı Reseıdegi Barnaýylda, Kemerovo oblysynda qarbyz ósirip, jaqsy ónim alǵandardy kórdi. Olardyń aýa raıy bizdikimen uqsas, bir endikte jatyrmyz. Sodan bastap qyzyǵýshylyǵy bastaldy», - deıdi Nıkolaıdyń zaıyby Elena.
Birinshi jyly shaǵyn ǵana jerge ekken olar, bıyl kartoptyń ornyn tolyq osy qarbyzǵa arnapty. 300 túptiń árqaısysy ortasha 20 keliden bergen.
«Qarbyzdyń 30 surpyn ektik. Arasynda «Vıktorııa», «Top gan», «Ataman», «Astrahanskıı», «Krımson Svıt» sııaqty tanymal túrleri bar. Kúıeýim olardy Máskeýden aldyrady. Elıtalyq tuqym, bizdiń aýa raıyna beıimdelgen. Arasynda ekzotıkalyq túri, dámi ózgeshe – sarylary da bar. Qazir biz tájirıbeden ótkizip jatyrmyz. Olardyń ónimdiligine ǵana emes, dámine, sapasyna da qaraımyz. Keıin árıne, arasynan tańdap alamyz», - deıdi Elena.
Nıkolaıdyń da, Elenanyń da agronomııaǵa qatysy joq. Nıkolaı Malvenov – kólik júrgizýshisi. Alysqa qatynaıtyn júk kólikterin júrgizedi. Elenanyń aýylda óz kásibi bar, dúken ustaıdy. Otaǵasy búgingideı jolǵa shyqqanda onyń qarbyzdaryn kútip-baptaıtyn osy – Elena.
«Qarbyzdyń kóshetin sáýir aıynyń sońynda egemiz. Jylýsúıgish ósimdik qoı. Topyraq temperatýrasy 16 gradýstan tómen bolsa tamyrlary ólip qalady. Bıyl mamyr aıynyń basynda otyrǵyzdyq. Keıin eki aptaǵa kún sýytyp ketti. Sol kezde úsikke uryndyryp alyp, óskinderdiń 30 % shyqpaı qaldy. Sondyqtan únemi jaýyp, baıqap otyrý qajet. Alǵashqy qarbyzdy osy jyly shilde aıynyń ortasynda aldyq. Qazir ónimdi ekinshi ret jınap jatyrmyz», - deıdi ol.
Elenanyń aıtýynsha, SQO-da ósken qarbyzǵa ásirese, aýyldastarynyń arasynda suranys joǵary. Jergilikti qarbyzdy ósirýge pestıtsıdter qoldanylmaıdy. Ekologııalyq taza ónim bolǵandyqtan hosh ıisti, dámi de til úıiredi.
«Nıkolaıdyń aıtýynsha, qarbyzdy ósirýde úsh nársege asa mán berý qajet. Eń aldymen tuqym jaqsy bolýy kerek. Ekinshiden tamshylata sýarylýy qajet. Al úshinshiden qarbyzdy ósiremin degen úlken nıet bolýy kerek. Tek eńbektiń arqasynda ǵana bizdiń óńirde de jaqsy ónim alýǵa bolady», - deıdi Elena.
Bıyl Malvenovter otbasy 10 sotyq jerden 2 tonnaǵa jýyq ónim aldy. Áýesqoı baǵbandar áli bir jyldaı qarbyz ósirý isinde tájirıbe jınamaqshy. Al keıin ony tabys kózine aınaldyrmaq.
