SQO turǵyny asyl tuqymdy taýyq ósirýdi qolǵa aldy

PETROPAVL. QazAqparat – Soltústik Qazaqstan oblysy Meńgeser aýylynyń turǵyny «Bastaý» memlekettik baǵdarlamasy boıynsha grant alyp, «Haıseks ýaıt» asyl tuqymdy taýyǵyn ósire bastady, dep habarlaıdy QazAqparat tilshisi.

SQO Kásipkerler palatasy baspasóz qyzmetiniń málimetinshe, Mamlıýt aýdany Meńgeser aýylynyń týmasy Nurbolat Nurmanǵalıdyń qus qorasynda qazir asyl tuqymdy taýyqtyń 400-i bar. «Bastaý Bıznes» baǵdarlamasy boıynsha kýrstan ótken ol osylaısha óz isin bastap otyr.

«Óz kásibimdi ashýdy burynnan josparlaǵan edim. Sol úshin kásipkerler palatasynyń aýdandyq fılıalyna baryp, kásipkerliktiń negizderin úıretetin kýrsqa jazyldym. Osylaısha óz jobamdy qorǵap, 200 AEK mólsherinde grant aldym. Aýylda turǵannan keıin mal ne qus ustaý kerek. Men taýyq ósiremin dep sheshtim», - deıdi aýyl turǵyny.

Taýyqtyń «Haıseks ýaıt» tuqymy – jaqsy jumyrtqalaıdy. Bul qustar ári kúı talǵamaıdy. Jumyrtqasy da, eti de suranysqa ıe.

«Taýyqtardy kútip-baptaýǵa kóp qarajattyń qajeti joq. Qusty satyp almas buryn qora-qopsyny ázirledim. Qajetti jemazyq jetkilikti. Ár istiń óz qaýip-qateri bar ǵoı. Durys kútim bolmasa bir kúnde qyrylyp qalýy múmkin. Sol sebepti veterınarlarǵa tıisti ekpelerin de jasattym. Sharýashylyq shaǵyn, ázirge jumysshy alǵan joqpyn. Qustardy qaraýǵa otbasy músheleri kómektesedi», - deıdi Nurbolat Nurmanǵalı.

Úı qustaryn ósirýdi qolǵa alǵanyna Nurbolat ókingen emes. Ónimine suranys bar. Aýdanǵa ǵana emes, oblys ortalyǵyna da jetkizedi. Alaıda karantındik shekteýlerge baılanysty jumyrtqany jetkizýde azdaǵan qıyndyqtar bar. Saldarynan tabysy tómendegen.

«Sharýashylyqty úlkeıtkim keledi. Bolashaqta ınkýbatorıı ashyp, taýyqtan basqa qaz-úırektiń balapandaryn basyp shyǵaryp, satatyn bolamyn. Eń bastysy jumys isteýge degen ynta bolýy qajet», - deıdi Meńgeser aýylynyń turǵyny.