SQO turǵyny áleýmettik jeli arqyly mıtıngke shaqyrǵany úshin jaýapqa tartyldy

PETROPAVL. QazAqparat – Soltústik Qazaqstan oblysyndaǵy jergilikti pablıkterdiń ákimgeri óz paraqshasynda ekstremıstik uıymnyń is-áreketin nasıhattap, mıtıngke shaqyrǵany úshin ákimshilik jaýapqa tartyldy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl qalalyq sotynyń úkimimen jergilikti pablıkterdiń biriniń ákimgeri tótenshe jaǵdaı rejıminde qoǵamdyq tártipti buzýǵa arandatqany úshin 30 táýlikke qamaýǵa alyndy. Ol áleýmettik jelidegi paraqshasynda ekstremıstik uıymnyń is-áreketin nasıhattap, mıtıngke shaqyrǵan jazba qaldyrǵan.

«Qoǵamdyq tártipti buzýǵa shaqyratyn áreketter úshin jaýapkershilikti barlyǵy túsinýi qajet. Tótenshe jaǵdaı rejımi kezinde azamattardan sanalylyq jáne jaýapkershilik tanytýdy suraımyz. Barlyq qabyldanyp jatqan sharalar, onyń ishinde ýaqytsha shekteýler, eń aldymen, halyqtyń qaýipsizdigi men tynyshtyǵyn qamtamasyz etýge baǵyttalǵan», - deıdi SQO komendanty, PD bastyǵy Marat Tólebaev.

Sondaı-aq jalǵan aqparat taratqany úshin jaýapkershilik qarastyrylǵan. Jalǵan aqparat taratqan azamattar QR Qylmystyq kodeksiniń 274-baby boıynsha 3 jyldan 7 jylǵa deıin bas bostandyǵynan aıyrylýy múmkin. QR zańnamasynda qoǵamdaǵy tártipti buzýǵa ákeletin áleýmettik jáne ultaralyq arazdyqty qozdyrýǵa yqpal etetin arandatýshylyqtar úshin de jaýapkershilik bar.

Tótenshe jaǵdaı rejımi kezeńinde bılik ókiliniń zańdy talabyna nemese ókimine baǵynbaǵan jaǵdaıda 2 jylǵa deıin bas bostandyǵynan aıyrý jazasy kózdelgen.

Esterińizge sala keteıik, SQO polıtsııa departamentinde tótenshe jaǵdaı kezinde shekteý sharalary máseleleri boıynsha azamattar CALL-ortalyǵynyń 8 7152 61-25-42 telefonyna habarlasa alady. Sondaı-aq, polıtsııa qyzmetkerleri kúdikti tulǵalar, faktiler, sondaı-aq tótenshe jaǵdaı rejımin buzý týraly «102» arnasyna habarlaýdy suraıdy.