SQO turǵyndarynyń jylýǵa tólegen 22 mln teńgesi ózderine qaıtaryldy

PETROPAVL. QazAqparat - Soltústik Qazaqstan oblysynyń turǵyndaryna jylý úshin 22,5 mln teńgeden astam somaǵa qaıta esepteý jasalady, dep habarlaıdy QazAqparat.

Ulttyq ekonomıka mınıstri bekitken tarıf qalyptastyrý qaǵıdalaryna sáıkes, Soltústik Qazaqstan oblysynda jylý energııasyn esepteý aspaby joq tutynýshylarǵa jylýmen jabdyqtaý qyzmetin kórsetetin tabıǵı monopolııanyń 11 sýbektisine tekserý júrgizilgen. Syrtqy aýanyń naqty temperatýrasyn eskere otyryp, jylýmen jabdyqtaý qyzmetiniń quny qaıta esepteldi.

Tutynýshylar quqyǵyn qorǵaý maqsatynda tabıǵı monopolııalardy retteý komıtetiniń Soltústik Qazaqstan oblysy boıynsha departamenti joǵaryda atalǵan qaǵıda talaptaryna sáıkes, syrtqy aýanyń naqty temperatýrasyna súıene otyryp, tutynýshylarǵa jylý energııasynyń qunyn qaıta esepteý jumysyn aıaqtady.

Soltústik Qazaqstan oblysy boıynsha ótken jylytý kezeńinde jylý energııasyn esepteý aspaby joq tutynýshylarǵa 2019-2020 jylǵy jylytý kezeńi úshin jalpy somasy 22 562 883,65 teńge, onyń ishinde «Sevkazenergosbyt» JShS boıynsha 19 258 736,24 teńge qaıta esepteldi.

Osylaısha Soltústik Qazaqstan oblysy boıynsha júrgizilgen qaıta esepteýge sáıkes tutynýshylarǵa aqshalaı qarajat qaıtarylǵan.