SQO turǵyndarynyń aýlalary sýdan tazartyldy
PETROPAVL. QazAqparat - Soltústik Qazaqstan oblysynda turǵyn úılerdi sý basýdyń aldyn alý sharalary jasalýda, dep habarlaıdy «QazAqparat» HAA tilshisi SQO TJD baspasóz qyzmetine silteme jasap.
Oblys aýmaǵynda aýa temperatýrasy kóterilip, qar erip jatyr. Aýyl shetinen, turǵyn úı aýlalarynan sý sorǵytý jumystary júrgizilýde. Eldi mekenderde sý aǵatyn jyralar tazalandy. M.Jumabaev aýdanyndaǵy Benıash aýylynda bóget nyǵaıtyldy. Mámlút aýdanynda Mámlút kólindegi sý deńgeıin tómendetý úshin sýdy Plotskoe kóline aǵyzý maqsatynda «Petropavl - Qostanaı» avtojoly arqyly aryq qazyldy.
Shal aqyn aýdanyndaǵy birneshe aýylda jer qazý jumystary júrgizildi. Esil boıy aýyldyq okrýginde sýdy aǵyzý úshin Shortandy kólinen 100 metrge deıin jer qazý jumystary júrgizildi. Bul sharalar oblystyq mańyzy bar KT-39 «Povozochnoe-Baıan-Arhangelka» avtojolynyń jol tósemderin saqtandyrýǵa múmkindik beredi.
«Jaqyn mańdaǵy kóshelerdi sý basý qaýpin azaıtý úshin naýryz aıynan beri M.Jumabaev aýdanyndaǵy Býlaevo aýdan ortalyǵy mańyndaǵy, Mámlút aýdanyndaǵy Mámlút kóli jáne Qyzyljar aýdanyndaǵy Beskól mańynda ornalasqan aýmaqtarda sý sorǵytý jumystary júrgizildi. Búginde 170 eldi mekende 19 myń tekshe metrden astam sý sorǵytyldy», - dep habarlady baspasóz qyzmeti.
SQO-daǵy sý tasqyny jaǵdaıy turaqty, erigen qar sýlarynyń turǵyn úılerge zaqym keltirý jaǵdaılary tirkelgen joq.
