SQO turǵyndarynda 12 myńnan astam qarý bar
PETROPAVL. QazAqparat – Soltústik Qazaqstan oblysynyń turǵyndarynda tirkelgen 12 145 qarý bar, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, óńirde qazirgi ýaqytta 7172 azamattyq qarý ıesi bar. Olarda barlyǵy 12 145 qar bolsa, onyń 1033 oıyq uńǵyly qarý.
Qarý ıeleri únemi polıtseılerdiń nazarynda. Jazataıym oqıǵalarǵa jol bermeý, sondaı-aq qarýdy urlaýdy jáne ony odan ári qylmystyq maqsatta paıdalanýdy azaıtý maqsatynda tártip saqshylary qarýdyń durys saqtalýyn tekseredi. Jyl basynan SQO-da úsh ret «Qarý» jedel-profılaktıkalyq is-sharasy ótti. Jaqynda tórtinshisi uıymdastyrylady. Olar qaýipsiz saqtaý sharttaryn buzý faktilerin jáne tirkelmegen qarýdy anyqtaýǵa baǵyttalǵan.
«Qarý men oq-dárilerdi belgili talaptarǵa sáıkes durys bekitilgen seıfterde saqtaý qajet. Qala mártebesi berilgen eldi mekenderde turatyn qarý ıeleri dabylqaqqysh ornatýǵa mindetti. Seıfte qarýmen birge bógde zattardy: qundy zattar, aqsha nemese qujattar, qarýǵa berilgen qujattar jáne taǵy basqalardy saqtaýǵa tyıym salynǵanyn eske salamyz. Jyl basynan saqtaý qaǵıdalaryn buzǵany úshin SQO-da 493 adam jaýapkershilikke tartyldy. Budan bólek, ár bes jyl saıyn qarýdy qaıta tirkeý qajettigin ıeleri umytyp jatady. Osyndaı 172 soltústikqazaqstandyq jaýapqa tartyldy», - deıdi SQO PD ákimshilik polıtsııa basqarmasy bastyǵynyń mindetin atqarýshy Erlan Mádıev.
Jyl basynan oblysta tirkelmegen tegis uńǵyly 46 qarý tárkilendi. Bul quqyq buzýshylyq úshin ákimshilik jaza qarastyrylǵan. Al oıyq uńǵyly qarýdy zańsyz saqtaý qylmystyq zańnamamen jazalanady. Tirkelmegen qarýdy erikti tapsyrǵan jaǵdaıda jaýapkershilikke tartylmaıdy. Bıyl soltústikqazaqstandyqtar erikti túrde polıtsııaǵa 7 qarý tapsyrdy.
