SQO turǵyndarynan bankrot dep tanýǵa qatysty 630 ótinish tústi
Óńirlik kommýnıkatsııalar qyzmetinde «Merzimi ótken bereshekti retteý mehanızmi. Jeke tulǵalardyń bankrottyǵy» taqyrybynda brıfıng ótti.
SQO boıynsha Memlekettik kirister departamenti bereshekpen jumys basqarmasynyń basshysy Gúlnár Qadyrbekovanyń aıtýynsha, 3 naýryzdan bastap azamattardan bankrottyqqa ótinishter qabyldaý bastaldy, qazirdiń ózinde respýblıka boıynsha 47,7 myńnan astam ótinish kelip tústi, onyń 7,9 myńy qaralyp jatyr.
«Ótinishterdiń 94% Elektrondy úkimet portaly – eGov.kz arqyly tústi, qalǵany E-salyq azamat mobıldik qosymshasy arqyly qabyldandy.
SQO boıynsha 25 sáýirge deıin 630 ótinish kelip tústi, onyń ishinde 91 ótinish qabyldandy, 427-si keri qaıtaryldy. Qazirgi ýaqytta 112 ótinish qaralyp jatyr. Ótinishterdiń jartysynan astamy Petropavl qalasyna tıesili – 349, sondaı-aq Qyzyljar aýdanynan – 63, Aıyrtaý aýdanynan – 52, Músirepov aýdanynan 24 tústi», - deıdi Gúlnár Qadyrbekova.
«Qazaqstan Respýblıkasy azamattarynyń tólem qabilettiligin qalpyna keltirý jáne bankrottyq týraly» Zańnyń talaptaryna sáıkes 15 jumys kúni ishinde memlekettik kiris organdary ótinish bergen azamat týraly málimetterdi tekseredi.
«Bankter, mıkroqarjy uıymdary jáne/nemese kollektorlyq agenttikter aldyndaǵy borysh 5,5 mln teńgeden – 1600 AEK aspaýǵa tıis. Qaryzdardy tólemeý merzimi 12 aıdan asýy kerek. Múlik, onyń ishinde nekede alynǵan avtokólik, páter, úı, ýchaske, banktegi depozıt jáne taǵy basqasy bolmaýy qajet. Taǵy bir shart – qaryzdar boıynsha banktermen jáne mıkroqarjy uıymdarymen retteý rásimi júrgizilýi tıis», - deıdi basqarma basshysy.
Bankrot dep tanýǵa ótinim bergen, biraq shartqa saı kelmeıtin azamattarǵa 1414 servısinen telefon arqyly sottan tys bankrottyq rásimin qoldanýdan bas tartý týraly habarlama jiberiledi. Mundaı jaǵdaıda sottan tys bankrottyq krıterıılerine sáıkes ótinishti 3 aıdan keıin qaıta berýge bolady.
