SQO turǵyndaryna tótenshe jaǵdaı kezinde 4,5 mlrd jýyq teńgeleı kómek kórsetildi
PETROPAVL. QazAqparat – Soltústik Qazaqstan oblysynda tótenshe jaǵdaı kezinde áleýmettik kómek alýǵa 107 myńǵa jýyq adamnan ótinish tústi,dep habarlaıdy QazAqparat tilshisi.
SQO boıynsha «Memlekettik áleýmettik saqtandyrý qory» AQ málimetinshe,
42 500 teńge áleýmettik tólemdi alýǵa 106 myń 955 adamnan ótinish túsken.
Alaıda olardyń 1 131 tólem taǵaıyndaýdan bas tartyldy.
«Bul adamdarǵa tólem taǵaıyndalmaýynyń birneshe sebebi bar. Máselen,
tótenshe jaǵdaı engizilgenge deıingi sońǵy 12 aı ishinde memlekettik
áleýmettik saqtandyrý qoryna áleýmettik aýdarymdar túspegen. Keıbiri eki
jáne odan da kóp jumys berýshiden tabys alyp, eńbegin nemese kásipkerlik
jumysyn qashyqtan jalǵastyrǵan. Sondaı-aq keı turǵyndar bıýdjetten
zeınetaqy men járdemaqy sııaqty tólemder alsa da áleýmettik tólemge
ótinish bergen», - deıdi SQO boıynsha «Memlekettik áleýmettik saqtandyrý
qory» AQ dırektory Anar Júnisova.
Nátıjesinde jalpy somasy 4 mlrd 480 mln teńge 105 myń 429 adamǵa
taǵaıyndaldy. Al óńir boıynsha 2 306 adam áleýmettik tólemdi tótenshe
jaǵdaı kezeńinde kiristeriniń bolýyna baılanysty óz erikterimen qaıtardy.
«Bizdiń qor tótenshe jaǵdaıǵa baılanysty berilgen áleýmettik tólemnen
basqa jyl basynan 11 myńǵa jýyq adamǵa 1 040,7 mln teńge tóledi. Olar
eńbek etý qabiletinen, asyraýshysynan jáne jumysynan aıyrylǵandar.
Júktilik jáne bosaný, jańa týǵan balany asyrap alýy boıynsha 359,2 mln
teńge 1 myń adamǵa, bir jasqa tolǵanǵa deıingi bala kútimine baılanysty
432,7 mln teńge 5143 adamǵa tólendi», - deıdi Anar Júnisova.
