SQO turǵyndaryna ózen-kólderde sý temperatýrasynyń tómendegeni jaıly eskertildi
PETROPAVL. QazAqparat – Soltústik Qazaqstan oblysynda sýǵa shomylý maýsymy resmı túrde jabylǵan, mamandar ózen-kólderde sý temperatýrasynyń tómendegenin eskertti, dep habarlaıdy QazAqparat tilshisi.
«Qazgıdromet» RMK SQO fılıalynyń málimetinshe, 2 qyrkúıek kúni keshke, gıdrologııalyq beketterde sý maksımaldy túrde jylynǵan kezde sýdyń ortasha temperatýrasy 17,6 gradýs boldy. Sonyń ishinde Shal aqyn men Esil aýdandarynda sý eń az jylynǵan, munda 16 gradýs shamasynda ǵana.
Gıdrometeorologtar sý temperatýrasyn 19 gıdrologııalyq bekette táýligine eki ret ólsheıdi.
«Qazir aýa raıy jyly bolǵanymen, sý qoımalarynda ortasha sý temperatýrasy tómendedi. Sol sebepti bul ýaqytta sýǵa shomylý qaýipti, sýyq tıgizýden buryn arty ólimge ákelýi múmkin. Sýyq sýǵa túsken kezdeol júrek-qan tamyrlarǵa keri áser etip, kúsh túsiredi. Qan tamyrlar tarylyp, tromb úzilip ketýi múmkin. Sondaı-aq sozylmaly aýrýlar ýshyǵýy yqtımal. Temperatýranyń kúrt aýysýynan sińir tartylyp qalady, al bul óte qaýipti. Mundaı jaǵdaıda adamda úreı paıda bolyp, sýǵa ketýi múmkin», - deıdi mamandar.
SQO-da sýǵa shomylý maýsymy resmı túrde jabylǵan. Bıyl jazda 22 adam, sonyń ishinde 6 bala sýǵa ketip, mert boldy.
