SQO turǵyndaryna qoǵamdyq oryndarǵa barmaý usynyldy
PETROPAVL. QazAqparat – Soltústik Qazaqstan oblystyq Taýarlar men kórsetiletin qyzmetterdiń sapasyn baqylaý departamentiniń jetekshisi Serikbaı Qasmaqasov Óńirlik kommýnıkatsııalar qyzmetinde ótken brıfıngte koronovırýsqa qarsy atqarylyp jatqan sharalar jaıly aıtyp berdi, dep habarlaıdy QazAqparat tilshisi.
Serikbaı Qasmaqasovtyń aıtýynsha, qazirgi basty mindet – juqpaly indettiń elge enýine jol bermeý.
«Óńir turǵyndaryna Ońtústik-Shyǵys Azııa, Gonkong, Japonııa sekildi jáne koronavırýs ınfektsııasy kúnnen-kúnge órship bara jatqan elderge týrıstik sapardy keıinge qaldyrýǵa keńes beremin. Týrfırmalar jumsalǵan qarajatty qaıtaryp beredi. Jolǵa shyqpas buryn durystap oılanǵanyńyz jón, óıtkeni baryp-kelgen jaǵdaıda eki aptaǵa karantınde otyrasyz», - deıdi S.Qasmaqasov.
Departament mamandary turǵyndardy halyq kóp jınalatyn oryndarǵa barýdan bas tartýǵa keńes berdi. Al bazarlar, saýda oryndary men qoǵamdyq kólikterde zararsyzdandyrý jumystaryn qolǵa alynýy tıis.
«Kásiporyndar men uıymdardy biz qazir teksere almaımyz. Dezınfektsııa júrgizý qajettigi bazarlar týraly erejelerde jazylǵan. Olar mindetti túrde ǵımarat ishinde ylǵaldy tazalaý júrgizip, zararsyzdandyryp otyrý kerek. Mektepterde synyptarda sabyn bolýy tıis. Emdeý mekemelerinde is-qımyl algorıtmi bekitilgen. Bul máselege mán berýdi suraımyz. Qandaı ınfektsııanyń bolmasyn aerozoldy taralý joly bar. Dezınfektsııany koronavırýspen kúresý úshin emes, qazir júrip jatqan tumaý jáne JRVI-diń taralýyna jol bermeý úshin jasaımyz», - dedi óńirdiń bas sanıtarlyq dárigeri.
6 qańtar men 2 naýryz aralyǵynda SQO-ǵa Qytaı men Ońtústik Azııa elderinen 232 adam kelgen. Onyń 11-i stýdent.
«Oblysta akkredıttelgen zerthana jumys isteıdi. Sanıtarlyq-epıdemıologııalyq ortalyq zerthanasy Nursultan Nazarbaev kóshesi, 236 mekenjaıynda ornalasqan. Ol jerde oblystaǵy jalǵyz vırýsologııalyq zerthana bar. Taldaý 4-6 saǵattyń ishinde daıyn bolady. Ol zertteýlerdiń sapasyna tolyq jaýap beremiz. Koronavırýske de dıagnostıka jasaımyz», - deıdi S.Qasmaqasov.
