SQO turǵyndary latyn grafıkasyna kóshý bastamasyn qalaı qabyldady
Oblys basshysy Qumar Aqsaqalovtyń aıtýynsha, osy ýaqytqa deıin Prezıdenttiń latyn grafıkasyna qatysty tapsyrmasy aıasynda biraz sharalar atqaryldy. Halyq arasynda túsindirý jumystary da júrgizildi.
"Biz 500-ge jýyq sharany ótkizdik. Árbir topta, árbir ujymda, árbir uıymda túsindirý sharalary atqaryldy. Ózderińiz jaqsy bilesizder, bizdiń oblysymyzda xalyqtyń 65 protsenti - ózge ult ókilderi. Degenmen, atqarylǵan sharalardyń arqasynda barlyǵy latyn grafıkasyna kóshýdi qoldap otyr", - dedi Q.Aqsaqalov Astanada ótken baspasóz máslıxatynda.
Ákimniń aıtýynsha, oblys mektepteri jańa álippe boıynsha sabaq berýge daıyn bolady. Ótken jyldyń qarasha aıynda oblystyq kitapxanada latyn grafıkasyna úıretetin arnaıy ortalyq ashyldy. Ol jerde barlyq sabaqtar tegin beriledi.
"100 jańa oqýlyq" jobasy aıasynda 18 oqýlyq bizdiń oblysymyzǵa jetkizildi. Atalǵan shyǵarmalar aldymen kolledj ben ýnıversıtet stýdentterine taratylady. Árıne, ol bastama qazaq tilinde bilim alyp jatqan jastarǵa arnalyp otyr. Mysaly, bizde Soltústik Qazaqstan memlekettik ýnıversıtetinde bes myń stýdent oqysa, olardyń ishinde eki myń bala qazaq tilinde bilim alyp júr", - dep atap kórsetti Q.Aqsaqalov.
