SQO turǵyndary qysqa qajet kómirdiń 70%-yn túsirip aldy
Energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Pavel Shılovtyń aıtýynsha, óńir turǵyndaryna qystan qysylmaı shyǵý úshin 419 myń tonna kómir qajet. Onyń 297 myń tonnasyn, sonyń ishinde Petropavldaǵy jeke sektor turǵyndary 45,6 myń tonnany satyp aldy, osylaısha jalpy 71% qysqa qamdandy.
«Óńirde kómir jatqan 32 tuıyq bar. Onyń tórteýi Petropavlda ornalasqan. Qatty otyndy satýmen 21 kásiporyn aınalysady. Qazir oblysta kómir jetispeýshiligi joq. Tuıyqtarda 29 myń tonnasy jatyr. Sonyń 1 850 tonnasy Petropavlda. Halyq arasynda suranysqa ıe Qarajyra kómiriniń 50 tonnasy, Shubarkól kómiriniń 1 100 tonnasy, sondaı-aq 500 tonna Maıkóbe jáne 200 tonna Ekibastuz kómiri bar», - dedi Pavel Shılov óńirlik kommýnıkatsııalar qyzmetinde ótken brıfıngide.
SQO-ǵa jylytý maýsymy bitkenge deıin kómir jetkizilip turady. Qazirgi ýaqytta 2 030 tonna Qarajyra jáne 1 190 tonna Shubarkól kómiri jolda. Baǵasynda aıtarlyqtaı ózgeris joq.
«Kómirdiń baǵasy onyń túrine qaraı 10 myń men 17,5 myń teńge aralyǵynda. Eń qymbaty – Shubarkól men Qarajyra kómiri, baǵasy 13-17,5 myń teńge aralyǵynda. Eń arzany – Ekibastuz kómiri, 10 myń teńgeden bastalady», - deıdi Pavel Shılov.
Óńirde jyldaǵydaı kómir defıtsıti bolmaýǵa tıis. Mamannyń aıtýynsha, tek qarasha aıynda Petropavlǵa ǵana 8 myń tonna Shubarkól jáne 7 myń tonna Qarajyra kómiri jetkiziledi.
