SQO turǵyndary koronavırýsty kóbinde qaı jerde juqtyrady

PETROPAVL. QazAqparat – Soltústik Qazaqstan oblysynda koronavırýsty juqtyrý kórsetkishi elimiz boıynsha aldyńǵy oryndarda. Sońǵy eki aptada aýrý kórsetkishi 1,4 ese ósken, dep habarlaıdy QazAqparat tilshisi.

Óńirlik kommýnıkatsııalar qyzmetinde koronavırýstyń taralýy jáne vaktsınatsııa barysy boıynsha óńirdegi jaǵdaı baıandaldy.

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, epıdemıologııalyq jaǵdaı máz emes.

Ótken eki aptada qaýipti vırýsty juqtyrý 1,4 esege artqan.

Sońǵy táýlikte qaýipti ınfektsııa jańadan 163 adamda anyqtaldy. Onyń 90 %-ynda aýrý belgileri bar.

«Oblysta aýrý kórsetkishi 100 myń adamǵa shaqqanda sońǵy jeti kúnde 195,7-ge jetti, bul - respýblıka boıynsha joǵary kórsetkishterdiń biri. Óńir 2 qazannan «qyzyl» aımaqta. Epıdemıologııalyq tergeý kezinde turǵyndardyń koronavırýsty eń kóp qaıda juqtyratyny belgili boldy. Aýyrǵandardyń 42 % KVI-di adam kóp jınalatyn – saýda oryndarynda, qoǵamdyq tamaqtaný oryndarynda, poshtada, bankter men halyqqa qyzmet kórsetý ortalyqtarynda juqtyrǵan. Ekinshi orynda 24,3 %-ben otbasy tur. Sondaı-aq turǵyndardyń 21 % qoǵamdyq kólikte juqtyrǵan. Halyqtyń 9 % qaýipti ınfektsııany halyq kóp jınalǵan is-sharalarda, sonyń ishinde oıyn-toılarda, 2 % – jumysta, 1,7 % – oblys ishinde jáne tys sapar barysynda juqtyrdy», - deıdi Arman Kúshbasov.