SQO turǵyndary ınternettegi jalǵan habarlandyrýlarǵa aldanyp jatyr
Soltústik Qazaqstan oblystyq Polıtsııa departamentiniń baspasóz qyzmetinen málim etkendeı, qylmystardyń basym kópshiligi tanymal onlaın-servısterde jasalǵan. Qylmyskerler belgili taýar úshin aldyn ala tólem jasaýdy surap, keıin izderin sýytyp otyrǵan.
Oblys turǵyny «Kolesa» tegin habarlandyrýlar saıtynda aýylsharýashylyq tehnıkasyna arnalǵan shınany satyp alý úshin «satýshyǵa» 440 myń teńge aýdarǵan, osydan keıin alaıaq baılanysqa shyqpaı qoıǵan. Qylmysqa qatysy bolýy múmkin degen kúdikpen tártip saqshylary Almaty oblysy Qapshaǵaı qalasynyń 37 jastaǵy turǵynyn anyqtady. Ol búginde keltirgen shyǵynnyń ornyn toltyrdy.
Al Olx.kz saıtynda bir aıǵa páterdi arzanǵa jalǵa berý týraly habarlandyrýlar jıi-jıi ornalastyrylyp turǵan. Alaıda «jalǵa berýshi» páterdi alý úshin aldyn ala 25 pen 30 myń teńge aralyǵynda tólem jasaýdy suraǵan. Aqsha aýdarylǵannan keıin alaıaq qarasyn úzgen. Osy qylmysqa qatysy bolýy múmkin degen kúdikpen Pavlodar qalasynyń 25 jastaǵy turǵyny ustaldy.
«Ustalǵan boıjetken páterdi, bólmelerdi jalǵa berý týraly habarlandyrýlar ornalastyrǵan. Sóıleskende ózin jalǵan esimmen tanystyrǵan. Dálel retinde ınternet jelisinde ózi taýyp alǵan basqa adamdardyń jeke kýálikterin jiberip otyrǵan. Jalǵa berilgen páter úshin aldyn ala tólemdi Qiwi-ámııanǵa aýdartyp, keıin baılanysqa shyǵýdy qoıǵan. Atalǵan faktige qatysty QR Qylmystyq kodeksiniń 190-baby boıynsha qylmystyq ister qozǵaldy», - deıdi SQO PD Krımınaldyq polıtsııa basqarmasynyń aǵa jedel ýákili Vıtalıı Podchernın.
Tártip saqshylary jeke jáne qarjy málimetterin, SMS boıynsha keletin rastaý kodtaryn, bank kartasynyń syrtynda ornalasqan nómirler men kodtardy eshkimge aıtpaý qajettigin eskertip, ınternet-alaıaqtyqtyń qurbanyna aınalmaý úshin telefon men qosymshalarǵa qupııasózderdi qoıýdy usynady. «Hi-tech» jedel-profılaktıkalyq is-sharasy aıasynda polıtseıler osyndaı 2 oqıǵany ashty. Petropavl qalasynyń 34 jastaǵy turǵyny uıaly telefon taýyp alyp, onda ornatylǵan qosymsha arqyly Joom ınternet-dúkenine 15 myń teńgeniń taýaryna tapsyrys bergen. Bul somma gadjet ıesiniń Qiwi-ámııanynda bolǵan. Qazir onyń basqa da qylmystarǵa qatysy bar-joǵy anyqtalýda.
«Jaqynda Olx.kz saıtynyń ákimshiligi bizdiń qyzmetkerlerdiń ótinishimen óz paraqshalarynda ınternet-alaıaqtyqtan qorǵaný boıynsha aqparatty ornalastyrdy. Ony habarlamanyń tómengi jaǵynda satýshynyń telefony kórsetilgen jerden tabýǵa bolady. Bul aqparatty bolashaqta basqa da habarlandyrýdy tegin jarııalaıtyn servısterde ornalastyramyz. Eń bastysy - aldyn ala tólem jasaýdy suraǵandarǵa kúdikpen qaraǵan jón», - deıdi SQO PD Krımınaldyq polıtsııa basqarmasynyń basshysy Petr Klımov.
Polıtseıler ınternet-alaıaqtyq faktileri boıynsha shuǵyl túrde jaqyn mańdaǵy polıtsııa bólimshesine nemese 102, 39-48-07, 61-29-02, 61-93-75 telefon nómirlerine habarlasýdy suraıdy.
