SQO turǵyndary bıýdjet qarajaty qaıda jumsalyp jatqanyn baqylaı alady
PETROPAVL. QazAqparat - Soltústik Qazaqstan oblysynda «Ashyq bıýdjet» jobasy júzege asyrylady. Bul jańashyldyq turǵyndardy bıýdjet qarajatynyń qalaı jumsalǵanynan habardar etedi.
SQO ákimdiginiń otyrysynda «Qyzyljar - adaldyq alańy» jobalyq keńsesiniń jumysy talqylandy. Atalmysh joba aıasynda óńirde birqatar jańashyldyqtar engizilmek.
Atap aıtqanda, óńirde «Ashyq bıýdjet» jobasy júzege asyrylmaq. Ákimdikterdiń ınternet saıttarynda azamattar bıýdjettiń qalaı jumsalyp jatqanyn, salyq tóleýshilerdiń aqshasy qaıda baǵyttalatynyn kóre alady. Interaktıvti karta jasalýda, ol jerde qurylys jáne jóndeý jumystarynyń oryndalý barysyn qadaǵalaýǵa múmkindik týady. Óńir basshysynyń tarapynan bul jobalar qoldaý tapty.
«Qyzyljar - adaldyq alańy» jobalyq keńsesiniń barlyq usynystaryn qoldaımyz. Bizge úsh baǵyt boıynsha jumys jasaý kerek: memlekettik qyzmetterdi kórsetý, elektrondyq júıege kóshý, qurylys jáne jóndeý jumystaryn qadaǵalaý. Elbasynyń tapsyrmasyna saı bıyl óńirde áleýmettik nysandardy jóndeýge qyrýar qarajat bólinbek. Osynyń barlyǵyn tekserip, qadaǵalap otyrý qajet. Jergilikti ákimdikterdiń saıttarynda «Ashyq bıýdjet» jobasyn iske qosyp jatyrmyz. Ár adam bıýdjettiń qalaı ıgerilip jatqanyn kóre alady», - dedi aımaq ákimi Qumar Aqsaqalov.
Óńir basshysynyń tapsyrmasyna saı aýdan ákimderi jáne basqarma basshylary áleýmettik jelilerde óz paraqshalaryn ashýda. Bul memlekettik organdardyń ashyq bolýyna, azamattardyń ótinishterin jyldam qaraýǵa múmkindik beredi.
