SQO turǵyndary bıznes-jobalaryn tabysty júzege asyrýda

ASTANA. QazAqparat - Bıyl 2021-2025 jyldarǵa arnalǵan kásipkerlikti damytý jónindegi ulttyq joba (budan ári – Ulttyq joba) sheńberinde Soltústik Qazaqstan oblysy boıynsha kásipkerlik bastamalardy damytýǵa 274 grant berý josparlanǵan. Búginde óńirde 178 adam memleketten qoldaý aldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

Ulttyq jobaǵa qatysýshylardyń biri Aqjar aýdanynyń turǵyny Darıha Qurbanova. Ol 1 380 000 teńge kóleminde memlekettik grant alyp, Voshod aýylynda óz naýbaıhanasyn ashty.

«Men otbasymmen Soltústik Qazaqstan oblysyna ótken jyldyń qyrkúıek aıynyń sońynda, ońtústikten soltústikke qonys aýdarý baǵdarlamasy boıynsha kóship keldim. Oblys ákimdigi maǵan memlekettik qoldaýdyń barlyq sharalaryn usyndy, kóshýge sýbsıdııa tóledi, turǵyn úımen qamtamasyz etti. Sonymen qatar bıznesti damytý úshin qaıtarymsyz grant týraly da egjeı-tegjeıli túsindirdi. Grant – óz kásibin bastamaq bolǵandar úshin keremet qoldaý», – dep bólisti Darıha Qurbanova.

Ol sondaı-aq qasyna kómekshi alǵanyn jáne bolashaqta óz bıznesin keńeıtýdi josparlap otyrǵanyn aıtty.

Esterińizge sala keteıik, 2023 jyly bıznes-ıdeıalardy iske asyrý úshin barlyǵy 9 000 grant berý josparlanyp otyr. Bul rette, osy jyldyń basynan bastap 5 317 grant berildi.

Business.enbek.kz portaly arqyly jańa bıznes-ıdeıalardy iske asyrý úshin memlekettik granttar alýǵa ótinishterdi qabyldaýdyń úshinshi legi 2023 jyldyń qyrkúıek aıyna josparlanýda. Tıisti habarlandyrý ótinishterdi qabyldaý bastalǵanǵa deıin kúntizbelik 10 kún buryn QR Eńbek jáne halyqty áleýmettik qorǵaý mınıstrliginiń jáne halyqty jumyspen qamtý máseleleri jónindegi organdardyń resmı ınternet-resýrstarynda jarııalanatyn bolady. Portalda ótinishterdi qabyldaý merzimi ár lekte 10 jumys kúnin quraıdy.