SQO turǵyndary «bank qyzmetkerlerine» jıi aldanady
PETROPAVL. QazAqparat – Petropavl turǵyny ınternet-alaıaqqa jem bolyp, 140 myń teńgesinen aıyrylyp qaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 23 maýsym kúni keshkisin belgisiz adam 42 jastaǵy Petropavl qalasynyń turǵynyna habarlasqan. Ózin banktiń qaýipsizdik qyzmetiniń mamany retinde tanystyrǵan ol, áıelge shottaǵy qarajatyn jymqyrý áreketi tirkelgenin aıtqan. Qylmyskerdiń jolyn kesý úshin kartochkanyń nómiri men CVV-kodty suraǵan. Ábirge túsken áıel qaskóıge barlyq derekti jaıyp salǵan. Budan keıin shotyndaǵy 140 myńnan astam teńge shynymen de joq bolǵan. Qala turǵyny polıtsııaǵa aryzdandy. Qazirgi ýaqytta qylmysker izdestirilip jatyr.
«Búgingi tańda alaıaqtyqtyń bul túri keń taralyp otyr. Qylmyskerler jábirlenýshini maqsatty túrde tańdaıtyn jaǵdaılar da kezdesedi. Biraq kóbine olar telefon nómirin kezdeısoq teredi jáne qaı bankten habarlasyp turǵanyn aıtpaıdy. Adamdardyń bári birdeı alaıaqtardyń aıla-amaldaryna túse bermeıdi. Bul – Krımınaldyq polıtsııa basqarmasy qyzmetkerleriniń aqparattyq jumystarynyń nátıjesi. Banktiń qaýipsizdik qyzmeti eshqashan derbes jáne qarjylyq derekterdi suratpaıdy. Kartochka nómiri men CVV-kod arqyly shottaǵy aqshany sheship alý qıyndyq týǵyzbaıdy. Sol sebepti olardy eshkimge aıtýǵa bolmaıdy», - deıdi SQO Polıtsııa departamenti bastyǵynyń orynbasary Rýslan Nazarov.
Tártip saqshylarynyń aıtýynsha, kúdikti habarlamalar túsken kezde call-ortalyqtar men bankterdiń «shuǵyl jelisine» jáne «102» arnasyna habarlasý qajet.
Jalpy, jyl basynan oblys polıtseıleri 29 ınternet-alaıaqtyq faktisin ashty.
