SQO turǵyndary 270-ten astam qarý-jaraq ótkizdi
PETROPAVL. QazAqparat - 2016 jyly halyqtan qarý-jaraq pen oq-dári satyp alý naýqany aıasynda soltústikqazaqstandyqtar 272 atys qarýyn erikti túrde ótkizdi, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Polıtsııaǵa oblys turǵyndarynan 245 ótinim kelip túsken. Nátıjesinde 12,5 mln teńgeden astam somaǵa 272 qarý men 2300 ıir oıyqty myltyq oǵy erikti túrde tapsyrylǵan. Olardyń basym bóligin tegis uńǵyly qarý quraıdy.
«12 aı qorytyndysy boıynsha, shamamen 8 myńǵa jýyq qarý ıeleri tekserildi. Qarýdy saqtaý, alyp júrý, tirkeý jáne qaıta tirkeý tártibi boıynsha 560 ákimshilik quqyqbuzýshylyq anyqtaldy. Zańsyz saqtalǵan 55 dana qarý aınalymnan shyǵaryldy», - dedi SQO ІІD ákimshilik polıtsııa basqarmasy basshysynyń orynbasary Bolat Jeksembınov.
Polıtsııa qarýdy erikti túrde tapsyrǵandardyń qylmystyq jáne ákimshilik jaýapkershilikten bosatylatynyn esterińizge salady.
