SQO turǵyny qaǵazdy ekinshi ret iske jaratyp, túrli buıymdar jasaıdy
PETROPAVL. KAZINFORM — Soltústik Qazaqstan oblysynyń turǵyny Elvıra Jahınanyń qolynan shyqqan zattar túrli baıqaýlarda joǵary baǵalanyp júr.
Esil aýdany Zagradovka aýylynyń turǵyny aldymen qaǵazdan tútikshe oraıdy.
Ol úshin A4 formattaǵy qaǵazdy uzynynan ekige bólip, sonyń jartysyn toqıtyn symnyń kómegimen oraıdy, ushyn jelimmen bekitedi. Keıin toqýǵa osy tútikshelerdi qoldanady.
— Qoldanylǵan qaǵazdy laqtyryp, peshke jaqqannan góri ony ekinshi ret paıdalanǵan durys qoı. Jumysyma negizinen gazetti jáne A4 formattaǵy qaǵazdy paıdalanamyn. Ofıstik qaǵazben jumys isteý yńǵaılyraq, formany jaqsy ustaıdy, myqty, ádemi bolyp keledi. Gazet jumsaq, ıkemge kóngish, balalarǵa úıretkende gazetti qoldanamyn, — deıdi sheber.
Elvıra Jahına mektepte kitaphanashy bolyp jumys isteıdi. Kabınetiniń ishi kirse — shyqqysyz.
Sondyqtan da bolar, sabaqtan úziliste balalar kitaphanadan tabylady. Bul jerde toqylǵan ydys-aıaq ta, túrli ósimdik-qustar da, ertegi keıipkerleri de bar.
— Lıýdmıla esimdi áriptesim bar, birde onyń toqyǵan vazasyn kórip, qatty qyzyqtym. Ol daıyn buıymdaryn boıaý úshin kádimgi ıodty qoldanady. Men ári qaraı izdenip, toqylǵan zattar ádemi bolýy úshin arnaıy boıaýlar qoldanamyn. Eń qymbaty — daıyn buıymǵa qoldanylatyn lak. Altyn, kúmis tústes arnaıy boıaýlary ballondarda satylady, olardyń da baǵasy arzan emes. Jelim de kóp kerek, óıtkeni tútikshe etip oralǵan ár qaǵazdy jelimdeý qajet, — deıdi Elvıra Jahına.
Bul óner ótken ǵasyrda paıda bolǵan.
Sheberdiń aıtýynsha, osy tásilmen túrli zatty, tipti, dızaınerlik jıhazdy da toqyp shyǵýǵa bolady.
— Bul jumysta eń qıyny — shydamdylyq. Kóp eńbekti talap etetin jumys. Tapjylmaı otyryp isteýge kóbiniń shydamy jetpeıdi. Ári qııalyń ushqyr bolýy kerek. Keıde shabytyń tún ortasynda oıanýy múmkin, mundaıda qyzyǵyna berilip, túnniń bir ýaǵyna deıin aınalysýym múmkin. Toqýy qıyn emes, ony belgili bir formaǵa keltirý qıyn. Bir buıymdy birneshe kún isteıtin kezderim bolady. Mysaly myna aqqýy bar kompozıtsııany alaıyq, mundaǵy ár bólshek jeke-jeke toqylyp, keıin bári qosylady. Aýylda turǵannan keıin úı sharýasy jeterlik. Ári jumysym bar. Sondyqtan hobbımen aınalysýǵa keıde ýaqyt jetpeı qalady. Biraq bul is maǵan qatty unaıdy. Demalamyn, basqa álemge engendeı bolamyn, toqyp otyryp. Al ıdeıa jumys barysynda keledi kóbine, — deıdi sheber.
Túrli baıqaýlarda joǵary baǵa alǵanymen, ol jasaǵan buıymdaryn satpaı, kóbine dostaryna, týǵan-týystaryna syılaǵandy jón sanaıdy.
Buǵan deıin kıiz úı jabdyqtaryn toqıtyn qolóner sheberi Qalımash Kárimberdıeva jaıynda jazǵan edik.
