SQO turǵyny áleýmettik jelide aýyl turmysy men qazaqy ónerdi nasıhattap júr
PETROPAVL. KAZINFORM – Soltústik Qazaqstan oblysynyń turǵyny Jaınagúl Temirhanova belgili aktrısa Samal Eslıamovanyń aýyldasy. Ol #Qazalemi baıqaýyna qatysyp, týǵan jerinen vıdeo jarııalady.
On saýsaǵynan óner tamǵan sheber, besaspap maman Jaınagúl Maralqyzyna qolónershilik ájesinen daryǵan. Kishkentaıynan keıýananyń qasynda otyryp, ınesin sabaqtap, mata qıyndylarynan qýyrshaǵyna kóılek tigetin. Qazir qoly bos ýaqytta qazaqı dúnıeni - qyz jasaýyna arnalǵan kórpe-jastyq, dıvan japqyshtar, balalar jamylǵysyn, ulttyq kıimder, qorjyndar tigedi. Kesteni de, toqýdy da meńgergen.
- Qazaǵym «úıren de jıren» dep beker aıtpaǵan ǵoı. Bilgenniń paıdasy bolady. Máselen pandemııa bastalyp, úıden shyǵa almaı qamalyp qalǵanda qolyma ıne-jip aldym. Alǵashqy kórpemdi anama tiktim. Bitken dúnıe ózime de, anama da unady. Kórpeni sýretke túsirip, áleýmettik jelige salyp edim, qyzyǵyp, tapsyrys bergender boldy. Tek bir jylda júzge jýyq kórpe-jastyq tikken ekenmin, - deıdi Jaınagúl Temirhanova.
Jaınagúl Maralqyzynyń negizgi mamandyǵy – mýzykant. Aqan seri atyndaǵy oblystyq fılarmonııanyń dombyrashysy.
- Alǵash qolyma dombyrany jeti jasymda alyp, sodan beri tastaǵan emespin. Úıdegi apa-sińlilerim de mýzykaǵa jaqyn. Gıtarada oınaımyz, birer jyl buryn jetigen aspabyn meńgerdik. Otbasylyq merekelerde, basymyz qosylǵanda shańyraqtan án-kúı úzilmeıdi.
Bizden kórip balalarymyz da, jıender de ónerge qyzyǵýshylyq tanytyp, úırenip jatyr, - deıdi Petropavl turǵyny.
Jaınagúl Maralqyzy qazir qalada turǵanymen, jumysynan qoly qalt etse, týǵan aýylyna asyǵady. Aqqaıyń aýdany Aralaǵash aýylynda onyń ata-anasy turady.
- Aýylym - eń súıikti mekenim, sol sebepti demalys kúnderi, bos ýaqyt bola qalsa, kóńil aýylǵa tartyp turady. Qalanyń qym-qýat tirshiliginen sharshap barǵanda qasıetti mekenimnen kúsh alamyn.
Uldarymdy da aýylǵa jıi aparamyn, jazǵy demalysty olar ata-ájeleriniń qastarynda ótkizedi. Úı sharýasyna kómektesedi, otyn da jarady, aram shóp te julady. Ásirese er bala qaıdan shyqqanyn bilip, aýylmen baılanysty úzbeýi tıis, - deıdi keıipkerimiz.
Qaımaǵy buzylmaǵan qazaqy aýyldyń qysqy kórinisin Jaınagúl Temirhanova Nurlan Qoıanbaev #Qazalemi heshtegimen jarııalaǵan baıqaýǵa usyndy.
- Ár adam úshin týǵan mekeninen ystyq, oǵan jeter jer joq. Bul baıqaý kópshilikke týǵan ólkesimen maqtanýǵa taǵy bir múmkindik. Bizde asqaraly taý bolmaǵanymen, qarasań kóz jetpeıtin jazyq dala, qaıyńdy-qaraǵaıly ný orman bar. Elimizdiń tabıǵatynyń bir ereksheligi de osy ǵoı, - deıdi Jaınagúl Temirhanova.
Buǵan deıin vıdeolary arqyly kópshilikke Qarqaraly tabıǵatyn pash etip júrgen qutqarýshy Oljas Tóleýbekpen tanystyrǵan edik.