SQO turǵyndarynyń jeke qarajatyna soǵys jyldary tank kolonnasy men ushaq jasaldy
PETROPAVL. KAZINFORM — Ekinshi Dúnıejúzilik soǵys jyldary Soltústik Qazaqstan oblysynyń turǵyndary maıdanǵa ózderiniń jeke qarajattarymen de qoldaý kórsetti. Jeńisti tek kútip qana qoımaı, ony óz qoldarymen jaqyndatýǵa bar kúsh-jigerin saldy.
SQO tarıhı-ólketaný mýzeıinde saqtalǵan derekter boıynsha soǵystyń alǵashqy eki jylynda oblys eńbekkerleri qorǵanys qoryna 29 mln rýbl aýdarǵan. Bul sol kezeń úshin óte qomaqty qarajat edi.
Óńir turǵyndary maıdanǵa qoldaý kórsetý úshin baǵaly buıymdaryn da aıamady.
Soǵystyń alǵashqy aılarynda soltústikqazaqstandyqtar Qorǵanys qoryna aqsha men oblıgatsııalardan bólek, jalpy salmaǵy 9,5 keli bolatyn kúmis jáne altyn áshekeı buıymdaryn — saqına men syrǵalaryn tapsyrdy.
— Burynǵy Lenın, qazirgi Esil aýdany Jańalyq aýylynyń kolhoz tóraǵasy Tólegen Temirbaev 1943 jyly 130 myń rýbl jeke qarajatyn qorǵanys qoryna aýdaryp, «Meniń aqshama tank jasatyp, maıdanǵa jiberýlerińizdi suraımyn» dep Iosıf Stalınge hat jazdy. 1944 jyly onyń atyna joǵary basshylyqtan jedelhat keldi. Onda «Sizdiń bronetank áskerine degen qamqorlyǵyńyz úshin alǵys bildiremin. Tilegińiz oryndalady. I.Stalın» degen jaýap boldy. Bul tyldaǵy árbir eńbekkerge rýh bergendeı boldy, — deıdi mýzeı qyzmetkeri Vera Andreeva.
Mamlıýt aýdanyndaǵy Vılıams atyndaǵy kolhozda turatyn Teplıakovtar otbasy da qorǵanys qoryna 120 myń rýbl aýdardy.
Bul shańyraqtan toǵyz adam maıdanda shaıqasty. Jınalǵan qarajatqa «Soltústikqazaqstandyq kolhozshy» atty tank kolonnasy men «Jaýynger qurbylar» ushaǵy jasaqtaldy.
— Soltústikqazaqstandyqtar maıdandaǵy jerlesterimen tyǵyz baılanys ornatty. Sonyń bir dáleli — maıdanǵa syılyq-hattarmen delegatsııalar jiberý dástúri. Alǵashqy delegatsııa 1941 jyldyń jeltoqsanynda attandy. Onyń quramynda belgili jazýshy Ivan Shýhov boldy. Ol eki aptadan astam ýaqyt maıdan shebinde bolyp, jerlesteriniń erligin óz ocherkterinde beıneledi, — deıdi Vera Andreeva.
1942 jyldyń aqpanynda Petropavldan Qyzyl Armııanyń 24 jyldyǵyna oraı maıdanǵa 12 vagon syı-sııapat jóneltildi. Onyń ishinde 50 tonna et, 10 tonna qatyrylǵan tátti toqashtar, pechene, sondaı-aq analar, áıelder men ápke-qaryndastar daıyndaǵan túrli taǵamdar men temeki boldy.
Jalpy alǵanda, soǵystyń alǵashqy eki jylynda maıdanǵa Soltústik Qazaqstan oblysynan 82 vagonǵa jýyq kómek jiberildi.
Buǵan deıin Kazinform tilshisi aq tarynyń atasy Shyǵanaq Bersıev maıdan dalasyna qalaı kómekteskenin jazdyq.
