SQO turǵyndaryna ınternet alaıaqtar bıyl 450 mln teńge shyǵyn keltirgen
PETROPAVL. KAZINFORM – Soltústik Qazaqstan oblysynda ınternet alaıaqtyq faktileri ótken jylmen salystyrǵanda 13 paıyzǵa artqan. Bir táýlikte ortasha alǵanda 4 adam qylmystyń osy túrinen zardap shegedi.
SQO prokýratýrasynda ınternet alaıaqtyqpen kúresýge baǵyttalǵan sharalardyń tıimdiligi máselesi qaraldy. Aldyn alý jumystary júrgizilgenimen ınternet alaıaqtyq faktileri azaıar emes. Jyl basynan beri óńirde osyndaı 456 qylmys tirkelse, sonyń 47-si ǵana sotqa deıin jetken. Sonyń 26-synda zardap shekkender ózderi qylmyskerlerdi anyqtap bergen.
«Óńirde bıyl alaıaqtyqqa qatysty 644 qylmys tirkelse, sonyń 70%, ıaǵnı 456 qylmys – ınternet alaıaqtyq. Ókinishke oraı atqarylyp jatqan aldyn alý jumystarynan tıisti nátıje joq, ony halyq sezinbeıdi. Keı óńirlerde ınternet alaıaqtardan zardap shekkender quqyq qorǵaý organdarynyń jumysyna narazylyqtaryn bildirip shyqty. Internet alaıaqtyq qylmysy ósip keledi, jyl basynan beri turǵyndarǵa 450 mln teńge shyǵyn keldi. Petropavl, Aıyrtaý, Aqjar, Maǵjan Jumabaev, Qyzyljar jáne Taıynsha aýdandarynda alaıaqtardyń quryǵyna ilinip jatqandar kóp. Qylmyskerler jazasyz qalyp otyr. Mysaly polıtseıler «HaıTek» jáne «Antı-Ford» aıasynda 76 istiń ashylǵany týraly esep berdi. Biraq onyń 27-i toqtatylǵan. Tergeýshiler kópshiligin eshqandaı sebepsiz jaýyp tastaǵan», - deıdi SQO prokýratýrasy basqarmasy bastyǵynyń mindetin atqarýshy Maksım Dorovık.
Quqyq qorǵaý organdary ókilderiniń aıtýynsha, buǵan sebep qylmyskerlerdiń basqa memleketten bolýy.
«Internet alaıaqtar aqshany birden sheteldik shottarǵa aýdarady. Bizge jábirlenýshiler ýaqyt ótkizip, ortasha eseppen tek 3 kúnnen keıin keledi. Bul tym kesh. Qaskóıler kóbinese shetelde otyryp, dropperlerdi qoldanady. ıAǵnı kelisim boıynsha qazaqstandyqtyń bank kartasyna urlanǵan aqsha túsedi, onyń 10% ol ózinde qaltyrsa, qalǵanyn sheteldik shotqa aýdarady», - deıdi SQO Polıtsııa departamenti bastyǵynyń birinshi orynbasary Qurmanǵalı Ysmaǵulov.
Buǵan deıin qarjy pıramıdasyn basqardy degen kúdikke ilingen áıelge halyqaralyq izdeý jarııalanǵanyn jazǵan edik.
