SQO turǵyndary medıtsına salasynda qandaı máselelerge jıi shaǵymdanady

Medıtsınalyq qyzmet sapasy, dári-dármekpen qamtamasyz etý jáne zańsyz medıtsınalyq qyzmet kórsetý máseleleri óńirde ózektiligin joıǵan joq. Byltyr turǵyndardan júzdegen shaǵym túsip, ol baqylaý organdarynyń tekserisine negiz bolǵan.

Medıtsınalyq jáne farmatsevtıkalyq baqylaý komıtetiniń SQO boıynsha departamentiniń málimetinshe, ótken jyly medıtsınalyq kómek kórsetý jáne dári-dármekpen qamtamasyz etý sapasyna qatysty 95 jospardan tys tekserý júrgizgen. Nátıjesinde 64 óreskel zańbuzýshylyq anyqtaldy. Eń jıi kezdesken kemshilikter qatarynda medıtsınalyq uıymdardyń standarttaryn saqtamaý, dıagnostıka men emdeýdiń klınıkalyq hattamalary talaptarynyń oryndalmaýy, dárilik zattardy ótkizý qaǵıdalaryn buzý jáne medıtsınalyq buıymdarǵa sáıkestik sertıfıkattarynyń bolmaýy bar.

Sondaı-aq byltyr medıtsınalyq kómek kórsetý sapasy, patsıentterdi qabyldaýdy uıymdastyrý, eńbekke ýaqytsha jaramsyzdyq paraqtaryn berý jáne medıtsınalyq-áleýmettik saraptamaǵa joldaý máseleleri boıynsha departament 358 ótinishti qaraǵan. Sonymen qatar dári-dármekpen qamtamasyz etý jáne dárilik zattardy ótkizý qaǵıdalaryn buzýǵa qatysty 68 ótinish túsken.

— Sapasyz, jalǵan jáne tirkelmegen dárilik zattardy anyqtaý maqsatynda Departament qyzmetkerleri prokýratýra organdarynyń tekserýlerine qatysyp, nátıjesinde tirkelmegen dárilik preparattar anyqtalǵan. Tekserý qorytyndysy boıynsha medıtsınalyq qyzmet salasynda 45 ákimshilik hattama toltyryldy. Onyń ishinde 40 hattama jeke tulǵalarǵa, 5 hattama zańdy tulǵalarǵa qatysty rásimdeldi. Salynǵan aıyppuldardyń jalpy kólemi 1,15 mln teńgeden asty, — deıdi departament basshysy Aıgúl Takeeva.

Mamannyń aıtýynsha, farmatsevtıkalyq baqylaý salasynda taǵy 18 ákimshilik hattama jasalyp, olardyń nátıjesinde 2,5 mln teńgeden astam aıyppul salynǵan. Onyń ishinde bir laýazymdy tulǵa, 14 jeke tulǵa jáne úsh zańdy tulǵa jazalandy.

— Lıtsenzııa berýge keler bolsaq, byltyr medıtsınalyq qyzmetpen aınalysýǵa 176 ótinish túsip, 174 lıtsenzııa berildi. Eki ótinish zań talaptaryna sáıkes kelmeýine baılanysty keri qaıtaryldy, — deıdi Aıgúl Takeeva.

Departament zańsyz medıtsınalyq qyzmet kórsetý faktilerin anyqtaý boıynsha da jumys júrgizedi. Ákimshilik quqyqbuzýshylyq týraly kodekstiń 424-baby boıynsha byltyr 22 derek tirkelgen. Jaýapkershilikke 17 jeke jáne 5 zańdy tulǵa tartyldy. Olarǵa jalpy somasy 707 myń teńge aıyppul salyndy.

Al bıyl dárilik zattardyń sapasy men qaýipsizdigin baqylaý maqsatynda eki profılaktıkalyq baqylaý júrgizilip, anyqtalǵan olqylyqtardy joıý týraly nusqamalar berilgen. Sonymen qatar baqylaý sýbektilerine barmaı-aq 45 tekserý ótkizilip, tıisti usynymdar joldanǵan.

Departament málimetinshe, búginde SQO-da 260 dárihana jumys isteıdi. Onyń 148-i Petropavl qalasynda ornalasqan. Sońǵy jyldary óńirde dárihanalar sany aıtarlyqtaı ósken. 

Buǵan deıin ShQO-da prokýratýra aralasqannan keıin 811 turǵyn qajetti dári-dármekpen qamtamasyz etilgenin jazǵan edik.