SQO turǵyndary qyzmet barysynda telefonyn joǵaltqan qutqarýshyǵa syı jasady

PETROPAVL. KAZINFORM – Soltústik Qazaqstan oblysynda sý tasqyny kezinde qutqarýshylar aldyńǵy shepten tabylyp, qaýipti aýdandardan, eldi mekenderden turǵyndardy, úı janýarlaryn shyǵardy. Táýlik boıy bel sheship, tize búkpegen mamandarǵa halyqtyń alǵysy zor. Sondyqtan da bolar, sý basqan aýmaqta qalǵan ıtti shyǵarý barysynda telefonyn joǵaltyp alǵan qutqarýshy týraly oqıǵa kópshilikti beıjaı qaldyrmady. Qutqarýshy Aıbol Otarbaevtyń telefonyn sýǵa túsirip alǵanyn oqıǵa ornynda túsirilim jasap júrgen jýrnalıst-blogerler baıqap qalyp, bul jaıynda feısbýkke jarııalady. 

«Úsh kún buryn áriptesim Tólegen Imanovpen birge sý basqan Hrom zaýyt aýdanyna kelip, sol jerdiń qazirgi jaǵdaıyn túsirmek boldyq. Bizben birge qutqarýshylar otrıady, sonyń ishinde Aıbol boldy. Qaıyqpen júzip bara jatyp, garaj ústinde júrgen ıtterdi baıqap qaldyq. Jaqyndap kelip, Aıbol ıtterge jetý úshin qorshaýdyń ústinen ótti. Sol kezde ústine kıgen arnaıy rezeńke kıiminiń ishki qaltasynan telefonynyń sýǵa túsip ketkenin baıqap qaldym. 

Ol ıtterdi bizge alyp berdi, sosyn qaltasyn aqtaryp telefonyn izdeı bastady. Men oǵan telefonyn sýǵa túsirip alǵanyn aıttym. Qandaı telefon dep edim, 11 aıfon ekenin aıtty. Biz bul oqıǵa jaıynda habarlap, turǵyndarmen birge jańa telefon alyp beremiz dep edik, eshkimge aıtpańyz, qajet emes dep azar da bezer boldy», - deıdi bloger-jýrnalıst Zakırjan Mamlıýtov. 

Óńir turǵyndary úsh kúnniń ishinde 550 myń teńge jınap berdi. 

«Telefon satatyn dúkendermen kelistim, Petropavldaǵy saýda ortalyqtarynyń biri bizge úlken jeńildik jasap, IPhone 15 pro maks telefonyn beretin boldy. Biz munshalyqty kóp qarajat jınalatynyn bilgen joqpyz, aqsha jetip turǵannan keıin sapalysyn aldyq. Al qalǵan qarajatqa qutqarylǵan ıtterge azyq satyp alyp, aparyp berdik. 

Memlekettik qyzmetshige mundaı qymbat syılyq jasaýǵa bolmaǵandyqtan, biz Aıboldyń qaryndasy Laýrany taýyp, telefondy Laýraǵa syıladyq. Al Laýra ony aǵasyna bermek. 

Jalpy osy sý tasqyny kezinde halyqtyń qandaı kúsh ekenin kórdim. Biz birgemiz, biz qandaı bolsyn qıyndyqty jeńemiz», - deıdi Zakırjan Mamlıýtov. 

Buǵan deıin sý tasqynynan zardap shekken 66,4 myń adamnyń úsh aı kredıt tólemeıtinin aıtqan edik.