SQO turǵyndary arasynda elektromobılge qyzyǵýshylyq artyp keledi
PETROPAVL. KAZINFORM — Soltústik Qazaqstan oblysynda elektr kólikterine suranys artyp keledi. Qazirgi ýaqytta óńirdiń 15-shi nómir belgisi 43 elektromobılge taǵylǵan.
Petropavl turǵyny Alekseı (esimin tolyq atamaýymyzdy surady) — Zeekr 001 markaly elektromobıldiń ıegeri.
SQO úshin ázirge tańsyq kólikti byltyr Qytaıdan tapsyryspen aldyrǵan. Elektromobıli teriskeıdiń saqyldaǵan sary aıazyna tótep berdi, ıaǵnı kólik kóńilinen shyqty.
«Qytaıdan tapsyryspen ákelgendikten brokerlerge jáne shetelden ákelingen paıdalanylǵan kólik quralynyń qaýipsizdiginiń dáleldeıtin sertıfıkat úshin ǵana tóledim. Basqa eshqandaı alym bolǵan joq. Jalpy utymdy tustary kóp. Benzınmen júretin kóliktermen salystyrsaq, buryn janarmaıǵa ketetin shyǵynym 70% azaıdy. Qazirgi ýaqytta 1 kVt 60 teńge turady. Men kóligimdi qýattaý úshin aptasyna 2800 teńge ǵana jumsaımyn. Burynǵydaı túrli maılaryn, antıfrız aýystyrýdyń qajeti joq», — deıdi Alekseı.
Ol, sondaı-aq Petropavldaǵy elektr kólikterin qýattaıtyn jalǵyz ortalyqtyń ıesi. Aıtýynsha, onyń 5-6 turaqty klıenti bar. Óńirge elektromobılmen kelgender, kóbinese astanalyqtar jáne reseılikter de jıi kelip, ortalyqtyń qyzmetine júginedi eken.
«Elektr kóligimen birge standartty qýattaýshy quraly birge keledi. Eger kólik ıesi jeke úıde tursa, esh qıyndyqsyz óz úıinde-aq qýattap alady. Úı jaǵdaıynda tolyq qýattaýǵa 9-12 saǵat ýaqyt qajet. Al eger bizdiń ortalyqqa keletin bolsa, bizde 1,5-2 saǵattyń ishinde tez qýattap alýǵa bolady», — deıdi Alekseı.
SQO-ǵa alǵashqy elektromobıl 2022 jyly ákelinip, Tesla markaly kólik tamyz aıynda tirkeýden ótken. Qazirgi ýaqytta oblys joldarynda, SQO Polıtsııa departamenti baspasóz qyzmetiniń málimetinshe, Toyota, Volkswagen, Honda, Tesla, Zeekr, Mercedes-Benz markaly 43 kólik júr. Onyń 35-i byltyr esepke alyndy.
«El aýmaǵyna elektromobıl ákelý úshin jeńildetilgen tarıf belgilengen. Qazaqstan Respýblıkasynyń azamatyna kedendik baj jáne salyqtardy tóleýden bosatyla otyryp, 1 elektromobıldi jeke paıdalanýy úshin ákelýge ruqsat berilgen. ıAǵnı ýtılızatsııalyq alym da tólenbeıdi. Avtokólik ıesine kólik quralyn memlekettik tirkeý úshin ǵana tóleıdi. Ákelingen kóliktiń shyǵarylǵan merzimi 3 jyldan asqan jaǵdaıda bul soma 250 AEK mólsherinde bolmaq», — deıdi SQO PD protsessıng ortalyǵynyń bastyǵy Áset Máten.
Petropavl turǵyny Alekseıdiń aıtýynsha, ol elektromobıl satyp alǵanyna ókinip otyrǵan joq.
«Elektromobıldiń eń úlken mınýsy — baǵasynyń qymbattyǵy. Buryn qoldanysta bolǵanynyń ózin eń keminde 18 mln teńgege alasyń. Quny ári qaraı óse beredi. Ekinshisi — ázirge alys jolǵa shyǵý qaýipti. Óıtkeni elektromobılderdi qýattaıtyn qoǵamdyq stantsııalar jol boıynda joq. Petropavldan shyqqannan keıin eń jaqyny Şýchede, al Reseıge baratyn bolsań — Ombyda ornalasqan. Petropavldyń ózinde bir ǵana ortalyq jumys isteıdi», — deıdi elektromobıl ıesi.
