SQO trassasynda júk kóligi janyp ketti
SQO Tótenshe jaǵdaılar departamenti baspasóz qyzmetiniń málimetinshe, Taıynsha aýdany Kellerovka eldi mekeniniń mańynda IVECO júk kóliginen órt shyqqandyǵy jóninde habar «101» nómirine saǵat 11.36 mınýt ketkende túsken.
Mamandar kelgen kezde kóliktiń qozǵaltqysh bóliginen shyqqan jalyn onyń tirkemesine aýysyp, tolyq jaıylyp úlgergen. Mashına tolyq janyp ketti.
SQO Polıtsııa departamenti baspasóz qyzmeti órt kezinde eshkimniń zardap shekpegenin rastady.
«Júk kóligi Petropavldan shyǵyp, Taıynshaǵa bara jatqan. Bos bolǵan. «Petropavl-Astana» avtojolynyń 382 shaqyrymynda fýra jana bastaǵan. Aldyn ala boljam boıynsha, órt symdardyń qysqa tuıyqtalýynan bolýy múmkin. Rýlde otyrǵan er adam aman, zardap shekken joq. Patrýldik polıtsııa batalonynyń qyzmetkerleri sol jerde qazir jol qaýipsizdigin qamtamasyz etip jatyr», - deıdi baspasóz qyzmetiniń ókilderi.
Óńir qutqarýshylar sońǵy kezde avtokólikte bolatyn órtterdiń kóbeıgenin aıtady. Máselen byltyr osyndaı 5 órt tirkelse, bıyl jyl bastalǵaly 10 avtokólik órtten zaqymdanǵan.
Vıdeodan alynǵan kadr
