SQO trassasynda kólik 16 qoıdy soqty

PETROPAVL. QazAqparat – Soltústik Qazaqstan oblysynda jeńil kólik júrgizýshisi jolǵa shyqqan qoımen soqtyǵysyp, saldarynan birneshe mal óldi, dep habarlaıdy QazAqparat tilshisi.

Jol-kólik oqıǵasy ornynan túsirilgen vıdeo áleýmettik jelide tarady. Soǵylǵan qoılar ár jerde shashylyp qalǵan.

Bul derekke qatysty SQO polıtsııa departamenti túsinik berdi.

«12 qazan kúni saǵat 09.15-te Shal aqyn aýdanynyń 68 jastaǵy turǵyny Mitsubishi kóligimen «Jezqazǵan-Petropavl» tasjolynyń Esil aýdany Qaratal aýylynyń mańynda qoılardy soqty. Saldarynan 16 bas malǵa zaqym keldi. Jol-kólik oqıǵasy mal ótetindigi týraly eskertý belgisiniń aýmaǵynda bolǵan. Júrgizýshi aman, kólik mehanıkalyq zaqymdandy.

Qazirgi ýaqytta SQO PD patrýldik polıtsııa batalonynyń qyzmetkerleri materıal jınap, jol ýchaskesiniń osy bóliginde qaýipsizdikti qamtamasyz etýde.

Buǵan deıin Taıynsha aýdanynyń Kremenchýg eldi mekeniniń mańynda 14 qoıdyń kólik astyna túsip qyrylǵanyn aıtqan edik.

Qyrkúıek aıynyń sońynda Esil aýdany ıAvlenka eldi mekeniniń aýylynda da osyǵan uqsas jol-kólik oqıǵasy tirkeldi.