SQO trassasynda eki kólik janyp, 2 adam qaza tapty

PETROPAVL. QazAqparat – Soltústik Qazaqstan oblysy Aralaǵash aýylynyń mańynda eki kólik soqtyǵysyp, ekeýi da janyp ketti. Eki adam mert bolsa, júk kóliginiń júrgizýshisi túrli jaraqatpen aýrýhanaǵa jetkizildi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, 17 tamyz saǵat 21:45 shamasynda «Astana – Petropavl» avtojolynyń 431-shaqyrymynda, ıaǵnı Aqqaıyń aýdany Aralaǵash aýylynyń mańynda «Toyota Hiace» avtomashınasy men jartylaı tirkemesi bar «MAN» júk kóligi soqtyǵysyp qaldy.

Saldarynan eki avtokólik te janyp ketti.

«Toyota Hiace» kóliginiń 52 jastaǵy júrgizýshisi men onyń 54 jastaǵy jolaýshysy, ekeýi de Astana qalasynyń turǵyny – jol-kólik oqıǵasy bolǵan jerde kóz jumdy.

«MAN» júk kóliginiń 43 jastaǵy júrgizýshisi túrli dene jaraqatymen oblystyq kópbeıindi aýrýhanaǵa jatqyzyldy.

Atalǵan fakti QR Qylmystyq kodeksiniń 345-baby boıynsha Sotqa deıingi tergep-tekserýlerdiń biryńǵaı tizilimine engizildi.

Polıtseılerdiń aıtýynsha, tıisti saraptamalar taǵaıyndalǵan. Oqıǵa orny men kólikter muqııat tekserilip, barlyq mán-jaıdy zerdeleýge baǵyttalǵan qajetti tergeý áreketteri júrgizilip jatyr. Olardyń nátıjeleri boıynsha túpkilikti protsestik sheshim qabyldanady.