SQO trassasynda departament kóligine oq atylǵan: Tergeý bastaldy
PETROPAVL. QazAqparat – Soltústik Qazaqstan oblysynda «Chelıabi-Novosibir» avtojolynyń Chıstoe eldi mekeni mańynda belgisiz bireýler jeńil kólikke qarýdan oq atqan, dep habarlaıdy QazAqparat tilshisi.
Oqıǵa keshe, 18 jeltoqsan kúni bolǵan. Zaqymdanǵan kóliktiń fotosýretteri áleýmettik jelide tarady.
«18 jeltoqsan kúni saǵat 11.00 shamasynda «Chelıabi-Novosibir» avtojolynyń 635-shaqyrymynda, Chıstoe eldi mekeniniń mańynda «Hyundai Accent» avtokóligi tabyldy. Mashınanyń memlekettik tirkeý nómiri bolmaǵan, júrgizýshi otyratyn jaǵynan eki ret oq atylǵan. Zardap shekkender joq.
Keıin belgili bolǵandaı, zaqymdanǵan avtokólik SQO bilim salasynda sapany baqylaý departamentine tıesili eken. Mashına Petropavldyń 25 jastaǵy turǵynyna bekitilgen.
Jigittiń aıtýynsha, 17 jeltoqsan kúni saǵat 22.00 shamasynda kólik synyp qalǵan, sondyqtan ol mashınanyń memlekettik nómirlerin sheship alyp, joldyń shetine qaldyryp ketken.
Bul fakti «Bireýdiń múlkin qasaqana joıý nemese búldirý» baby boıynsha Sotqa deıingi biryńǵaı tergep-tekserýlerdiń tizilimine engizildi. Qazirgi ýaqytta polıtseıler bul qylmysty jasaǵandardy anyqtaý úshin jedel tergeý sharalaryn qolǵa aldy», - delingen M.Jumabaev aýdandyq polıtsııa bólimshesi taratqan aqparatta.
