SQO trassasynda 4 avtokólik soqtyǵysty
PETROPAVL. QazAqparat – Petropavlda qolaısyz aýa raıynan tórt avtokólik soqtyǵysty, zardap shekkender joq, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqıǵa búgin saǵat 09.30-da «Jezqazǵan-Petropavl» avtojolynyń 956-shaqyrymynda, Petropavldan shyǵar jolda bolǵan.
Oblys ortalyǵynan Beskól aýylyna bet alǵan «Nissan Juke» avtomashınasy «Volkswagen» avtokóligine soǵylǵan. Kólik avarııalyq belgisin qosyp, jol shetine toqtaýǵa májbúr boldy.
Keıin «Mercedes-Benz» kóligi aldymen «Nissan Juke»-ke, odan ári «Toyota Land Cruiser Prado»-ǵa soǵylǵan.
Zardap shekkender joq. «Nissan Juke» jáne «Mercedes-Benz» avtomashınalarynyń júrgizýshilerine «Kólik quraldarynyń búlinýine alyp kelgen, kólik quraldary júrgizýshileriniń jol júrisi qaǵıdalaryn buzýy» baby boıynsha ákimshilik hattama toltyryldy. Jınalǵan materıaldar protsessýaldyq sheshim qabyldaý úshin ákimshilik sotqa jiberiledi.
Ótken jyly SQO aýmaǵynda 238 jol-kólik oqıǵasy tirkeldi, saldarynan 38 adam qaza taýyp, 315-i jaraqat aldy. Jyl bastalǵaly 7 jol-kólik oqıǵasynda bir adam qaza taýyp, 7-eýi jaraqat aldy.
