SQO topan sýdan zardap shekken maqtaaraldyqtarǵa gýmanıtarlyq kómek jiberdi
PETROPAVL. QazAqparat – Soltústik Qazaqstan oblysynyń kásipkerleri topan sýdan zardap shekken Maqtaaral aýdanynyń turǵyndaryna 20 tonna azyq-túlik jiberdi, dep habarlaıdy QazAqparat tilshisi.
Gýmanıtarlyq júk artylǵan kólik búgin Petropavldan Túrkistan oblysyna bet aldy. Soltústikqazaqstandyq kásipkerler topan sý basqan eldi meken turǵyndaryna birinshi kezekte qajet azyq-túlikti artyp jiberdi. Gýmanıtarlyq kómek 2 myń 200 shaqyrymdy artqa tastap eki táýlikten keıin jetedi.
«SQO atynan «DEZ» JShS ónimi - 12,5 tonna 1 sortty un, 1,5 tonna joǵary sortty un arttyq. Sondaı-aq «Soltústik» ÁKK 5 tonna kartop jáne «Sultan» kompanııasy 1 tonna makaron ónimderin berdi. Bul júk zardap shekken turǵyndarǵa demeý bolady dep senemiz», - deıdi «Soltústik» áleýmettik kásipkerlik korporatsııasy» AQ bólim basshysy Asqar Kýchýkov.
«Jas Otan» jastar qanaty ókilderi júkti artýǵa jáne jiberýge kómektesti.
«Osyndaı qıyn kezde bárimiz biriksek, qandaı bolsyn qıyndyqty jeńip shyǵamyz. Sýdan zardap shekken baýyrlarymyz bul aýyrtpalyqty oıdaǵydaı ótkeredi dep oılaımyn. Óńirdiń kásipkerleri shette qalmaı, kómek qoldaryn sozyp jatyr», - deıdi «Jas Otan» jastar qanatynyń tóraǵasy Birjan Qudaıbergenov.
