SQO Taıynsha aýdanynyń ákimi sot talabyn oryndamaǵany úshin jazalandy

  PETROPAVL. KAZINFORM – Soltústik Qazaqstan oblysy Taıynsha aýdanynyń ákiminen memleket esebine 74 myń teńge óndirilip alyndy. 

SQO sotynyń málimetinshe, oblystyq mamandandyrylǵan aýdanaralyq ákimshilik sotyna er adam Taıynsha aýdany ákimdiginiń hattamalyq sheshiminiń kúshin joıý týraly talap aryz bergen. Ákimshilik isti qaraý kezinde sot jaýapkerge osy jyldyń 3 qańtaryna deıin osy organ basshysynyń ýájdelgen ustanymyn kórsetip, talap aryzǵa jazbasha jaýap berýdi mindettedi. Sondaı-aq bul talapty oryndamaǵan jaǵdaıda jaýapkerge onyń quqyqtyq saldary týraly, atap aıtqanda sot talabyn oryndamaǵany úshin sot 20 AEK mólsherinde aqshalaı óndirip alýǵa quqyly ekendigi túsindirildi.

Alaıda, sotpen belgilengen merzimde jaýapker — Taıynsha aýdanynyń ákimi talap aryz boıynsha jaýap bermegen.

Osyǵan oraı sot Taıynsha aýdanynyń ákimine aqshalaı óndirip alýdy qoldaný týraly máseleni talqyǵa shyǵardy.

Aqshalaı óndirip alýdy qoldaný zań men sotqa qurmetpen qaraýdy qalyptastyrýǵa da yqpal etedi.

Aýdan ákimi sotqa talap aryzǵa pikirdi jáne ýájdelgen ustanymyn belgilengen merzimde usynbaýynyń dáleldi sebepterin túsindire almady.

Sot uıǵarymymen Taıynsha aýdanynyń ákiminen 20 AEK mólsherinde, ıaǵnı 73 840 teńge respýblıkalyq bıýdjet kirisine óndirilip alyndy. 

Aqshalaı óndirip alýdyń ereksheligi — bul jaza qoldanylǵan tulǵalar ony óz qarajaty esebinen bıýdjet kirisine tóleıdi.

Sot uıǵarymy zańdy kúshine endi.