SQO: Taıynsha aýdanynda tótenshe jaǵdaı jarııalandy
PETROPAVL. KAZINFORM – Soltústik Qazaqstan oblysy Taıynsha aýdany aýmaǵynda jergilikti aýqymda tabıǵı sıpattaǵy tótenshe jaǵdaı jarııalandy. Búgin Krasnaıa polıana jáne Chernıgovka eldi mekenderinde úılerine qarǵyn sý kirgen turǵyndar men olardyń maly qaýipsiz jerge shyǵaryldy. Dobrojanovka aýylynda sý ázirge úıge kirgen joq, evakýatsııalaý máselesi sheshilip jatyr.
SQO Tótenshe jaǵdaılar departamenti bastyǵynyń orynbasary Murat Qanǵojınovtyń aıtýynsha, Taıynsha aýdanynda ázirge 8 adam evakýatsııalandy. 187 turǵyn úıi bar Krasnaıa polıana eldi mekenine búgin saǵat 11.30 shamasynda qarǵyn sý kelgen. Saldarynan 6 úıge sý kirdi. Eki baspana ıesi úıinde bolmaǵan. 4 adam evakýatsııadan bas tartsa, tórteýin qutqarýshylar týystaryna apardy. Sý basqan aýmaqtan 30 shaqty mal shyǵaryldy.
Chernıgovka eldi mekeninde úılerine sý kirgen 4 adam jáne 14 úı janýary qutqaryldy.
Osy kúni 25 turǵyn úıi bar Dobrojanovka eldi mekenine de erigen qar sýy kirdi. Qarǵyn sý bes úıdiń aýlasyn basty.
Sý kelip jatyr. Qazirgi ýaqytta turǵyndardy evakýatsııalyq pýnktke jáne maldy jergilikti sharýashylyq aýmaǵyna kóshirý máselesi qaralyp jatyr. Sondaı-aq, sýdy burý jumystary qolǵa alynǵan.
Oqıǵa ornynda SQO TJD bastyǵy júr.
