SQO taýar óndirýshileri Astanadaǵy jármeńkege arnaıy daıyndyqpen keldi
ASTANA. QazAqparat - Búgin «Qazaqstan» sport saraıynyń alańynda Soltústik Qazaqstan oblysy taýar óndirýshileriniń jármeńkesi bastaldy, dep habarlaıdy QazAqparat.
Osy aptanyń senbi jáne jeksenbi kúnderi ótetin osy jármeńkede ónimderdi tómen baǵamen satyp alýǵa jaǵdaı jasalyp otyr. Soltústikqazaqstandyqtar Astanaǵa 725 tonna ónim alyp keldi.
SQO Aýyl sharýashylyǵy basqarma basshysynyń orynbasary Altynbek Abdýllaevtyń aıtýynsha, Soltústik Qazaqstan oblysynyń barlyq aýdandary men Petropavl qalasynyń 115-ke tarta kásiporny óz ónimderin usynyp otyr. Osy oraıda qala turǵyndary arasynda suranysy joǵary kókónis pen mal eti eleýli kólemdi jetkizildi.
«Bizdiń óńirdiń taýar óndirýshileri osyndaı jármeńkelerge belsendi túrde qatysady. Sáıkesinshe, búgin Astana turǵyndary da oblystan jetkizilgen ónimderdi jaqsy alyp jatyr. Atap aıtqanda, bul jármeńkege keıbir sharýa qojalyqtary arnaıy daıyndyqpen keledi»,-dep toqtaldy ol.
A. Abdýllaevtyń sózine qaraǵanda, Qyzyljar aýdanynyń turǵyny Evgenıı Nıkıforov búgin elordaǵa 4 tonna qaz jáne úırek etin jetkizgen.
«Bul otbasy qus etin daıyndaýǵa sonymen qatar ózderiniń aýyldastaryn da jumyldyryp, eldi meken turǵyndaryna tabys jasaýǵa kómektesip otyr. Osy jumystyń barlyǵyn olar óz qoldarymen júzege asyryp keledi. Olardyń jumysyn jeńildetý úshin búginde sýbsıdııalaý boıynsha memlekettik baǵdarlamalar bar ekenin túsindirdik, ıaǵnı jeńildikti nesıe arqyly óndiristi avtomattandyrý úshin qajetti tehnıkany satyp alý múmkindigi bar. Taıaý arada olardyń kásibin keńeıtý baǵytynda tıisti qoldaý sharalaryn uıymdastyrmaqpyz»,-deıdi basqarma ókili.
Óz kezeginde Evgenıı Nıkıforov aýyl sharýashylyǵy jármeńkelerine úsh jyl qatarynan qatysyp kele jatqanyn aıtty. «Biz úshin Astanada saýda-sattyq júrgizý tıimdi, osynda ónimge suranys bar. Sonymen qatar elorda jármeńkeleri jaqsy uıymdastyrylady. Al Petropavl qalasynda ónimdi ótkizý kólemi aıtarlyqtaı tómendeý. Sondyqtan ózimizdiń sharýashylyqty keńeıtý aıasynda biz osyndaı úlken jármeńkelerge qatysýǵa tyrysamyz»,-deıdi qus ósirýshi.
