SQO sybaılas jemqorlyq deńgeıi tómen aımaqtar qataryna endi
«Transparency Kazakhstan» qoǵamdyq qory «Qazaqstandaǵy sybaılas jemqorlyq jaǵdaıyna monıtorıng» áleýmettik saýalnamasyn júrgizdi. Bul jaıynda SQO boıynsha Sybaılas jemqorlyqqa qarsy vedomstvonyń basshysy Ernar Baıanǵazın óńir basshysy Qumar Aqsaqalov tóraǵalyq etken vedomstvoaralyq komıssııanyń otyrysynda málim etti.
Halyqaralyq reıtıng agenttigi júrgizgen áleýmettik saýalnamaǵa SQO-da 700 adam qatysty. «Ashyq dıalog» portalyna túsken 568 ótinish saralandy.
Ernar Baıanǵazınniń aıtýynsha, saýalnamaǵa qatysqandardyń kópshiligi óńirde «barmaq basty, kóz qystylyqqa» jol berilmeıtinin aıtsa, suralǵandardyń 7,1%-nyń pikirinshe, sybaılas jemqorlyq kúndelikti turmysta jıi kezdesedi, parasyz máseleni sheshýge bolmaıdy.
«Saýalnamaǵa qatysqan Shal aqyn, M.Jumabaev jáne Aıyrtaý aýdandary turǵyndarynyń 80% memlekettik qyzmetti esh qıyndyqsyz alýǵa bolatynyn aıtsa, basqa aýdandarda jaǵdaı basqasha. Máselen, Ǵ.Músirepov aýdany men Petropavl qalasy turǵyndarynyń 20-25%-y sybaılas jemqorlyq etek alǵan degen pikir qaldyrdy», - deıdi ol.
Mundaı saýalnama kásipkerler arasyda da júrgizildi.
«Petropavl qalasy, Aqqaıyń aýdany kásipkerleriniń 50% sybaılas jemqorlyqtyń keń taralmaǵanyn, alaıda para berý arqyly memlekettik organdarda máseleni tez sheshýge bolatyndyǵyn aıtsa, Jambyl aýdanynda suralǵandardyń 80%-y bul pikirge qosylady», - dedi E.Baıanǵazın.
Oblys turǵyndarynyń aıtýynsha, jer qatynastary boıynsha mekemelerde, halyqqa qyzmet kórsetý ortalyqtarynda, memlekettik aýrýhanalar men emhanalarda jáne balalar baqshasynda para berip, máseleni sheshý múmkindigi bar. Kásipkerlerdiń tiziminde keden, tótenshe jaǵdaılar departamenti jáne Shal aqyn aýdandyq ákimdigi júr.
«Alynǵan jaýaptardy saralaı kele, turǵyndar men kásipkerlerdi sybaılas jemqorlyqqa barýǵa ıtermeleıtin negizgi sebepti kórýge bolady. Olar para berý arqyly óz máselelerin sózbuıdalyqqa salmaı tez sheshýdi kózdeıdi», - dedi óz sózin qorytyndylaǵan vedomstvo basshysy.
Oblys ákimi Qumar Aqsaqalovtyń pikirinshe, respýblıka boıynsha óńirde sybaılas jemqorlyq deńgeıiniń tómen bolýy arqany keńge salýǵa sebep emes.
«Biz Sybaılas jemqorlyqqa qarsy strategııany jáne «Adaldyq alańy» jobasyn júzege asyrýda birigip is-áreket etýimiz qajet», - dedi óńir basshysy.