SQO sý qoımalarynda sý deńgeıi kóterilip, tasqyn qaýpi kúsheıdi

PETROPAVL. QazAqparat – Soltústik Qazaqstan oblysynda úsh sý qoımasy bolsa, sonyń ekeýi – Sergeev jáne Petropavl sý qoımalary shamamen 90 %-ǵa deıin tolǵan, dep habarlaıdy QazAqparat tilshisi.

Búgin SQO óńirlik kommýnıkatsııalar qyzmetiniń brıfınginde tótenshe jaǵdaılar departamentiniń mamandary kóktemgi sý tasqynynyń aldyn alýǵa qatysty óńirde atqarylyp jatqan jumyspen tanystyrdy.

Meteorologııalyq boljam boıynsha jáne ylǵal qoryn saralaı kele mamandar bıyl SQO-da kóktemde sý tasqyny bolady degen boljam jasap otyr.

«Kúzgi ylǵal qory keı jerlerde normadan 36%-ǵa artyq. Qar qalyńdyǵy jyldaǵydaı bolǵanymen, topyraq 60-150 sm aralyǵynda qatqan. Sergeev sý qoımasy 88,1%-ǵa tolyp, muz qalyńdyǵy 70 sm-ge jetken. Petropavl sý qoımasy 89%-ǵa tolǵan, muz qalyńdyǵy – 41 sm», - deıdi SQO TJD bólim bastyǵy Serik Naýryzbaev.

Arnaıy qyzmetterdiń kóktemgi sý tasqynyna ázirligin tekserý maqsatynda 4-5 naýryz aralyǵynda «Kóktem-2021» respýblıkalyq komanda-shtabtyq jattyǵýy ótedi.

Jaǵdaıdy baqylaýda ustaý úshin departamentte arnaıy shtab ta qurylǵan.

«Qazir SQO-da 6 myńnan astam turǵyny bar 79 eldi mekendi kóktemde sý basý qaýpi bar. Onyń 30-y ózenderdiń, 13-i kólderdiń tasýynan, qalǵany erigen qar sýynan zardap shegýi múmkin. Taǵy 92 eldi mekendi baqylaýda ustap otyrmyz. Sý tasqynymen kúreske 484 adamnan quralǵan arnaıy toptar jasaqtaldy. Olardyń qaramaǵynda 155 tehnıka, 8 júzý quraly jáne 83 motopompa bar. Kúrdeli jaǵdaı týyndaıtyn bolsa qosymsha 2 myńǵa jýyq adam, 1,5 myńǵa jýyq tehnıka tartylady», - deıdi Serik Naýryzbaev.

Búginge deıin eldi mekenderden 780 tekshe metr qar shyǵaryldy. Bul jumys áli de jalǵaspaq.