SQO sý qoımalarynda muzdyń erýi jalǵasyp jatyr
PETROPAVL. QazAqparat - Soltústik Qazaqstan oblysyndaǵy sý qoımalarynda muzdyń erýi áli de jalǵasyp jatyr, dep habarlaıdy «QazAqparat» HAA tilshisi.
«Qazgıdromet» RMK SQOF mamandarynyń málimetinshe, Esil ózeniniń tarmaqtaryndaǵy sý deńgeıi turaqty túrde túsip jatyr. Al Sergeevka qalasy janynda Esil ózeniniń deńgeıi bir táýlikte 65 sm, Pokrovka eldi mekeniniń janynda 70 sm kóterildi.
«Qyzyljar aýdany Novonıkolskoe eldi mekeni janynda Esil ózeni deńgeıi synı mejeden ótip ketti. Qaýipti deńgeı 780 sm bolsa, búgin tańǵy segizder shamasynda 837 sm-ge jetken. Saldarynan aýyl men respýblıkalyq mańyzy bar joldy baılanystyratyn kópir sý astynda qaldy», - delingen sınoptıkter bergen málimette.
Mamandardyń aıtýynsha, Sergeev sý qoımasyndaǵy sý deńgeıi 926 sm, kólemi 849 mln tekshe metrge jetti. Táýligine 774 m³/s sý jiberilip jatyr. Sý qoımasy arqyly sýdyń jıekten asyp aǵýy 126 santımetrdi qurady. Petropavl sý qoımasyndaǵy sý deńgeıi - 709 sm.
