SQO sý qoımalaryna bıyl 35,5 mln balyq dernásili jiberilmek
«Petropavl balyq tálimbaǵy» kásiporny bıyl memlekettik tapsyrys aıasynda Sergeev jáne Petropavl sý qoımalaryna 35,5 mln sıg balyqtarynyń dernásilin jiberýi kerek. Búgin arnaıy komıssııa alty aı boıy ósirilgen balyq dernásilin qabyldap aldy. Komıssııa quramyna balyq sharýashylyǵy ınspektsııasynyń ókilderi, jergilikti atqarýshy bılik organdary, balyq sharýashylyǵy ınstıtýtynyń jáne qaýymdastyqtyń mamandary kirgen.
«Sý qoımasyna jiberiletin dernásilderdiń sanyna ǵana emes, sapasyna da mán beremiz. Olar belgili bir talaptarǵa saı bolýy tıis. Mıkroskop arqyly kórdik, dernásilderdiń kúıi jaqsy, kólemderi sáıkes keledi, endi olar avtokólikpen Sergeev sý qoımasyna jóneltiledi. 30 mln dernásil sý qoımasyna jiberilýi tıis. Dernásilder mindetti túrde úsh saǵat ishinde jetkizý qajet, odan uzaq ýaqytqa olar shydamaıdy», - deıdi «Esil oblysaralyq basseındik balyq sharýashylyǵy ınspektsııasy» RMM basshysynyń orynbasary Marat Esimseıitov.
Sıg balyǵynyń dernásili ınkýbatsııalyq tsehtaǵy basseınderde arnaıy apparatpen ósirildi. Sý jándikterine qolaıly jaǵdaı jasaldy. Mamandardyń aıtýynsha, tsehtyń ishindegi aýa temperatýrasy + 1 gradýs, sýdyń temperatýrasy+ 6-7 gradýstan tómendemeýi tıis.
«Qazir biz dernásilderdi esepteımiz. Myna 10 lıtrlik sharada qansha dernásil baryn anyqtaý úshin biz matematıkalyq ádis-tásilderdi qoldanamyz. Eń aldymen 100 ml synama alamyz. Ydysqa dernásilderdi jınaımyz da arnaıy shyny tabaqqa quıamyz. Muny endi komıssııa músheleri sanaıdy, árqaısysynda shamamen 100-200-ge jýyq dernásil bolýy múmkin. Sonda ortasha eseppen 10 lıtrlik sharada 100 myńǵa jýyq bolady», - deıdi ınkýbatsııalyq tseh meńgerýshisi Anastasııa Molotkova.
Óńirde balyqtandyrý jumystary eki kúnge shaqtalǵan. Erteń Petropavl sý qoımasyna sıg balyǵynyń 5 mln dernásili jiberilmek.
SQO-da byltyr sý qoımalaryna balyqtyń 44 mlnnan astam dernásili jiberilgen eken.
