SQO: sý basqan Qyzyljar aýdany turǵyndaryna 540 mln teńge birjolǵy tólem jasaldy

PETROPAVL. KAZINFORM – Soltústik Qazaqstan oblysy Qyzyljar aýdanynyń 18 eldi mekeninde 1546 úıdi sý basty. Qazirgi ýaqytta bul baspanalardyń bárinen sý ketken, zardap shekkenderdiń dúnıe-múlkin baǵalaý, shyǵyndy esepteý jumysy júrgizilip jatyr. 

Óńirlik kommýnıkatsııalar qyzmetinde Qyzyljar aýdany ákiminiń baspasóz hatshysy Janel Batanova tasqyn sýdan keıin atqarylǵan jumysty aıtyp berdi.

Sáýirdiń 12-sinen bastap zardap shekken 1459 adamǵa 100 AEK kóleminde jalpy somasy 538 mln 662 myń teńge birjolǵy tólem jasaldy.

«Aýdanda zardap shekkenderdiń múlkine keltirilgen zalaldy baǵalaý jáne úılerdi tehnıkalyq tekserý jumystary júrip jatyr. Bul jumysty táýelsiz akkredıttelgen uıymdar atqarýda. Bastapqyda tehnıkalyq tekserýdi «Stadııa» JShS mamandary júrgizdi. Keıin kómekke óńirde mamandardyń bolmaýyna baılanysty elordalyq sarapshylar qosymsha tartyldy.

Búgingi kúni 929 úı zertteldi, 139 adamǵa múlik shyǵynynyń qorytyndysy berildi. 593 úı tehnıkalyq tekserýden ótip, 96 baspana boıynsha tekserý nátıjesi berildi. Mamandar qurylǵan keste boıynsha jumys istep jatyr, qazir sarapshylar Beskól, Teplıchnoe jáne Prıbrejnoe aýyldarynda júr», - deıdi Janel Batanova.

Bogolıýbovo eldi mekeninde 9 otbasynyń baspanasy apatty dep tanylyp, ornyna basqa úı alynatyn boldy.

«Qazirgi ýaqytta tasqynnyń saldaryn joıý maqsatynda Aqqaıyń aýdanynyń 5 mehanıkalandyrylǵan brıgadasy - 45 maman jumys istep, kómektesip jatyr. Olar aýmaqty qoqystan tazartady, úılerdi jóndeýge daıyndaıdy.

Sondaı-aq túrli bakterııalardyń, juqpaly aýrýlardyń taralýyna jol bermeý maqsatynda aýdan aýmaǵynda dezınfektsııalaý júrgizilýde», - deıdi aýdandyq ákimdik ókili.

Buǵan deıin SQO-da jarty mlrd teńgeniń astyǵyn órtep jibergen eki adamnyń sottalǵanyn aıtqan edik.