SQO stýdentteriniń AQSh-ta bilim alatyn múmkindigi bar

PETROPAVL. QazAqparat – Petropavlǵa Arızona ýnıversıtetinen delegatsııa keldi, sheteldik oqý orny jergilikti ýnıversıtetpen áriptestik ornatpaq, dep habarlaıdy QazAqparat tilshisi.

Óńirge áriptestik ornatý maqsatynda Arızona shtatynan delegatsııa kelgendigi jóninde Soltústik Qazaqstan oblysynyń ákimi Qumar Aqsaqalov óziniń áleýmettik jelidegi paraqshasynda jarııalady.

«Biz Arızona ýnıversıtetimen kelissóz júrgizip jatyrmyz. Buǵan deıin amerıkalyq áriptesterimiz bıyl mamyr aıynda kelgen edi. Ol joly biz eki ýnıversıtet arasynda áriptestik ornatý jaıynda sóz qozǵadyq. Endi delegatsııa keńeıtilgen quramda kelip otyr. Olar: Arızona shtaty Kongresiniń spıkeri Rassel Baýers, Arızona ýnıversıtetiniń prezıdenti Robert Robıns jáne osy ýnıversıtettiń akademııalyq máseleler boıynsha aǵa vıtse-prezıdenti jáne prorektor Lızl Foks», - dep jazdy Qumar Aqsaqalov.

Óńir basshysynyń aıtýynsha, sheteldik qonaqtar oblystaǵy mańyzdy bilim berý nysandarynda: M.Qozybaev atydaǵy SQÝ-in, Nazarbaev ıntellektýaldy mektebin jáne «Digital Urpaq» oqýshylar saraıynda boldy.

Delegatsııa «Abylaıhan rezıdentsııasy» mýzeı keshenin jáne jaqynda ashylǵan «Qyzyljar» art-ortalyǵyn aralady. Bul jerlerdi aralaý arqyly amerıkalyqtar qazaq halqynyń mádenıeti men tarıhynan, dástúrlerinen maǵlumat aldy.

Sondaı-aq qonaqtar YDA Group sheteldik kompanııasy salyp jatqan kóp salaly aýrýhanasynyń qurylysymen tanysty.

«Óńirde qolaıly ınvestıtsııalyq jaǵdaı jasalǵanyn aıtar edim. Nátıjesinde sheteldik kompanııalar qyzyǵýshylyq tanytyp jatyr. Qazir M.Qozybaev atyndaǵy SQÝ-dy Arızona ýnıversıtetine senimgerlik basqarýǵa berý máselesi qaralyp jatyr. Bul amerıkalyq ýnıversıtet álemniń úzdik 100 ýnıversıteti qatarynda. Oǵan qosymsha bizdiń stýdentterdiń eki dıplom alyp shyǵý jáne amerıkalyq ýnıversıtette bilim alýy múmkindigin qarastyryp jatyrmyz», - dedi SQO ákimi Qumar Aqsaqalov.