SQO stýdentteri «Serpindi» nasıhattaýǵa ońtústik oblystarǵa attandy

PETROPAVL. KAZINFORM – Soltústikqazaqstandyq stýdentter 6,5 myń shaqyrymdy avtobýspen júrip ótip, elimizdiń tórt óńirin aralap shyqpaq.

Жастар Серпін
Фото: Ерлан Махметов

Búgin Petropavldan Serpin Way brendtik avtobýsy jolǵa shyqty. Stýdentter men oqytýshylardan quralǵan top bul sapar barysynda Shymkent qalasyna jáne Jambyl, Túrkistan, Qyzylorda oblystaryna barmaq. 

Jolǵa shyqqandardyń biri - Qyzylorda oblysy Sáken Seıfýllın aýylynyń týmasy Baıjan Ábdirov. Ol qazir Manash Qozybaev atyndaǵy Soltústik Qazaqstan ýnıversıtetinde sońǵy kýrsta oqıdy. Bolashaq qazaq tili mamany. Dıplom alǵasyn osy soltústik óńirde eńbekke aralaspaq. 

- Men grantpen, óz qalaýymmen oqýǵa tústim. Petropavl qalasy unaıdy, buǵan deıin birneshe ret jarystarǵa qatysý úshin kelip, osy shahardy tabıǵaty, jaılylyǵy úshin unatqan edim. Endi basqa ini-qaryndastarymdy osy óńirge kelýge shaqyrmaqpyn.

Bul sapar barysynda 4 qalaǵa, 17 aýdan men 30 aýylǵa baramyz. 11 synypta oqıtyn, UBT tapsyryp jatqan túlekterge «Serpin» baǵdarlamasy jaıynda aıtamyz, - deıdi Baıjan Ábdirov. 

Bıyl Petropavldaǵy jergilikti ýnıversıtetke «Serpin» baǵdarlamasy aıasynda 200-ge jýyq kvota qarastyrylǵan.

- Bul baǵdarlama boıynsha oqýǵa túsken jastarǵa jataqhana beriledi, 2-3 kýrstan bastap jumysqa ornalasýǵa múmkindik beremiz. Jańa ortaǵa tezirek qalyptasýy úshin psıhologııalyq kómek beremiz, - deıdi ýnıversıtet prorektory Ádilhan Tólepbergen.

Qazirgi ýaqytta SQO-da «Serpin» baǵdarlamasymen 167 jas joǵary bilim alyp jatyr. Olardyń 65-i bıyl dıplom alyp, mamandyq ıesi atanbaq. 

Byltyr el boıynsha «Serpin» baǵdarlamasyna memleketten 4 myńǵa jýyq grant bólingen edi.

AL SQO-da on jylda «Serpin» baǵdarlamasymen 1,4 myńǵa jýyq jas joǵary bilim alǵan. Alaıda túlekterdiń 48% ǵana soltústik óńirde turaqtap qalǵan.

Сейчас читают