SQO statsıonarlarynda em alyp jatqan 325 syrqat ottegige táýeldi
PETROPAVL. QazAqparat – Soltústik Qazaqstan oblysynda koronavırýsty juqtyrǵandar sany azaıyp keledi, alaıda aýyrǵandardyń basym bóliginiń jaǵdaıy máz emes, ottegige táýeldi, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, ótken táýlikte oblysta koronavırýsty juqtyrýdyń jańa 103 jaǵdaıy tirkeldi.
Aýyrǵandardyń 51-i – Petropavl turǵyndary. Qaýipti ınfektsııany juqtyrǵandardyń 97-sinde, ıaǵnı 94 %-ynda KVI belgileri bolǵan.
Іndet bastalǵaly óńirde 534 150 ret PTR-test alynyp, sonyń 5,3 %-ynda – 32 748 jaǵdaıda zertteý oń nátıje kórsetken. Al ótken táýlikte 788 adamǵa PTR-test júrgizildi.
SQO óńirlik kommýnıkatsııalar qyzmetiniń málimetinshe, qazirgi ýaqytta oblystyń ınfektsııalyq statsıonarlarynda 542 naýqas em alyp jatyr.
Oladyń 325-i ottegine táýeldi bolsa, 48 adam jansaqtaý bólimshelerinde jatyr. Aýyrǵandardyń 99 %-y – vaktsına almaǵandar.
Jalpy SQO-da koronavırýs juqtyrǵan 32 748 syrqat tirkeldi, onyń ishinde 456 jaǵdaı syrttan ákelingen.
Sonyń ishinde 25 381 adamda – 76 %-ynda ǵana aýrý belgileri bolǵan.
